Qytaidy Aziia-Tynyq muhity óńiri elderiniń naryǵyna taýarlarymyzdy shyǵarýǵa múmkinik beretin tranzittik aimaq retinde qarastyramyz. Bul týraly «MIR» telearnasyna suhbat bergen QR Prezidenti Qasym-Jomart Toqaev aitty, - dep habarlaidy QazAqparat.
«Qazaqstan Qytai Halyq Respýblikasymen jańa ózara tiimdi qarym-qatynas qurýǵa nietti. Qazaqstandyq «Nurly jol« baǵdarlamasy men Qytaidyń «Jibek joly« ekonomikalyq beldeýi strategiiasy kóp jaǵdaida túiisedi jáne tuspa-tus keledi deýge de bolady. «Jibek joly« ekonomikalyq beldeýin qurý ideiasy 2013 jyly Qytai kóshbasshysy Si Tszinpinniń Qazaqstanǵa sapary barysynda alǵash ret aitylǵan edi. Ótken jyldyń kúzinde Beijińge saparym barysynda tóraǵa Si Tszinpinmen saýda bailanystarymyzdy keńeitý taqyrybyna úlken nazar aýdardyq. Búgingi kúni Qytai Qazaqstannyń eń iri syrtqy saýda seriktesi jáne ekonimikalyq seriktesi sanalady», - dedi Memleket basshysy.
Qazaqstan Prezidentiniń dereginshe, eki eldiń arasyndaǵy taýar ainalymynyń kólemi shamamen 14,5 mlrd dollardy quraidy. Sońǵy jyldary da taýar ainalymy eki mándi san tóńireginde bolyp otyr. 2018 jyly ósim qarqyny 11,5, al 2019 jyly 23 paiyzǵa jetti.
«Qazaqstan úshin Qytai naryǵy úlken múmkindik beredi. Muny qazir ǵana aityp óttim. Qytai qazaqstandyq energiia resýrstardyń dástúrli tutynýshysy sanalady jáne sońǵy jyldary tereń óńdelgen qazaqstandyq taýarlar jetkizilimi artyp kele jatqany baiqalady. Bizdiń shyǵystaǵy kórshimiz Qazaqstannyń ekologiialyq taza azyq-túlik ónimderin úlken suranyspen paidalanady. Buǵan qosa, biz Qytaidy Aziia-Tynyq muhity óńiri elderiniń naryǵyna taýarlarymyzdy shyǵarý úshin tranzittik aimaq retinde qarastyramyz. Qytaidan taýarlar teńiz joly arqyly Eýropaǵa 40 jáne odan da kóp kúnde jetkiziledi. Al Qazaqstan men Resei arqyly qurlyq jolymen ne bári 15 kúnde», - dedi Qasym-Jomart Toqaev.
Memleket basshysynyń atap ótýinshe, Qazaqstannyń Qytaimen saýda-sattyǵynyń úlesi jalpy taýar ainalymynyń 15 paiyzyn quraidy. Al Qytaidan tartylǵan investitsiia úlesi 7 paiyz bolyp otyr.
