Memleket basshysy Qazaqstan munai-gaz salasynyń 120 jyldyǵyna arnalǵan saltanatty jiynǵa qatysty, dep habarlaidy Aqordanyń baspasóz qyzmeti.
Qasym-Jomart Toqaev saltanatty jiynǵa qatysýshylarǵa iltipat bildirip, elimizdegi munai-gaz kesheniniń barsha eńbekkerlerin kásibi merekelerimen quttyqtady.
Memleket basshysy Qazaqstan munai ónerkásibiniń tereń ári dańqty tarihy jóninde aita kelip, ótken ǵasyrdyń 90-shy jyldarynda elimizdiń táýelsiz munai-gaz indýstriiasyn qalyptastyrý úderisinde qiyndyqtarǵa tap bolǵanyn eske saldy. Osy oraida bul salany damytý úshin shetelden kapital tartý isindegi Elbasy Nursultan Nazarbaevtyń orasan zor eńbegin atap ótti.
Qasym-Jomart Toqaev Qazaqstandaǵy munai ónerkásibiniń jetistikterine qysqasha toqtaldy. Sonyń ishinde, Prezident munai salasynda zamanaýi tehnologiia men ozyq tájiribeni meńgergen otandyq mamandardyń qatary kóbeigenin aitty.
Memleket basshysynyń sózinshe, búginde «Qazmunaigaz» ulttyq kompaniiasy Chevron, ExxonMobil, Shell, Lýkoil, Eni, Total, CNPC siiaqty korporatsiialarmen jáne basqa da kompaniialarmen iri jobalardy tabysty júzege asyryp keledi.
Prezident otandyq munaishylardyń urpaq sabaqtastyǵyna arnaiy toqtaldy. Ol Qazaqstan munai ónerkásibiniń negizin qalaýshy, Atyraý munai-gaz ýniversitetine aty berilgen Safi Ótebaevtyń osy salanyń qalyptasýyna zor úles qosqanyn atap ótti. Prezident munai-gaz salasyndaǵy qyzmetkerlerdiń jinaǵan tájiribesi men bilimi azamattarymyzdyń turmysyn odan ári gúldendirýge jáne jaqsartýǵa septigin tigizetin mańyzdy salalyq jańǵyrtý jumystaryn júrgizýge múmkindik beredi dep sanaidy.
Baiandamada munaishylar sheshýge tiisti birqatar mańyzdy mindetter aityldy.
– Salany damytýdyń strategiialyq josparyna sáikes, 2025 jylǵa qarai munai óndirý jylyna 100 million tonnadan, al gaz jylyna 77 milliard tekshe metrden asýy tiis. Osy maqsatta 2021-2025 jyldarǵa arnalǵan aýqymdy geologiialyq barlaý baǵdarlamasy ázirlenýde. Sarapshylardyń baǵalaýy boiynsha, Qazaqstannyń jalpy resýrstyq áleýeti 75 milliard tonna shartty otyn bolsa, Ortalyq jáne Soltústik Qazaqstannyń áleýetti resýrsy shamamen 18 milliard tonnany quraidy, – dedi Memleket basshysy.
Qasym-Jomart Toqaev Qazaqstannyń daiyn munai ónimderin satý isindegi kóshbasshylardyń biri bolýy tiis degen pikir bildirdi.
Onyń aitýynsha, bul Úkimettiń aldaǵy jyldardaǵy atqaratyn basty mindetteriniń biri. Bul rette, Prezident osy salaǵa innovatsiialardy engizýge, shikizat óndirý jáne ony ári qarai qaita óńdeý úderisiniń ekologiialyq tazalyǵyn arttyrýǵa nazar aýdarý qajettigin atap ótti.
– 2025 jylǵa qarai jalpy ishki ónimniń jyl saiynǵy turaqty ósimin 5 paiyzǵa jáne odan da joǵary deńgeide qamtamasyz etý kózdelip otyr. Bul meniń Qazaqstan halqyna arnalǵan Joldaýymda aityldy. Osy maqsattarǵa qol jetkizý barysynda elimizdiń munai-gaz sektory úlken ról atqarady, – dedi Memleket basshysy.
Saltanatty rásim sońynda Qasym-Jomart Toqaev munai-gaz ónerkásibiniń úzdik 41 qyzmetkerin marapattady.
