Qazaqstan Prezidenti Qasym-Jomart Toqaev internetti shekteýden eshbir paida bolmaitynyn túsindirdi, dep habarlaidy "Ult aqparat".
«31 arnada» kórsetilgen «Prezident 2.0» derekti filminde reseilik tilshi Aleksei Pivovarov Prezidentten internetti mólshermen taratýǵa qatysty pikirin surady.
"Bul – kúrdeli suraq. Biraq qazirgi zamanda ulý siiaqty bir qabyrshaqtyń ishinde qalyp qoiýǵa bolmaidy. Báribir adamdar ainalma jol taýyp, úlken jelige shyǵady. Bizdiń óz shyndyǵymyz bolýy kerek. Sony áleýmettik jeliler arqyly jetkize bilýimiz kerek.
Mysaly men úshin Twitter jeke telegraf agenttigim siiaqty. Twitter turǵanda jýrnalisterdi shaqyryp, suhbat berýdiń qajeti qansha maǵan? Prezidenttikke deiin men Instagram-da jazbaitynmyn. Qazir Instagram paraqsham turaqty jańaryp turady", - dedi Toqaev "Prezident 2.0" filminde.
Prezident áleýmettik jelilerdi qalai paidalanatynyn aityp berdi. Twitter arqyly halyqqa kóp nárseni jetkizýge bolady, Instagram da jaqsy júrip ketti, deidi ol.
"Áleýmettik jeliler – bul ómirlik shyndyq. Sonymen birge áleýmettik jeliler sheneýnikterdi halyqqa jaqyndatady. Ol da – shyndyq. Úshinshiden, jastardyń bári áleýmettik jelide otyrady. Aitpaqshy, qazirgi jastar teledidar kórmeidi. Ony bizdiń býynymyz, sosyn úide otyrǵan áielder ǵana kóretin shyǵar. Men ózim teledidardy az kóre bastadym", - dep atap ótti Toqaev.
Sonymen birge Memleket basshysy áleýmettik jeliler arqyly túsetin aryz-shaǵymdardy jiktep otyratynyn jetkizdi.
"Men ondai shaǵymdardyń, shynymen de, adamdardyń janaiqaiy ekenin sezemin. Instagram-ǵa túsken, Twitter-ge jazdy. Men sonyń bárin Prezident ákimshiligine nemese Premer-ministrge tapsyrma retinde jiberip otyrdym", - deidi Prezident.
Toqaevtyń aitýynsha, adamdar jeke suraqtar boiynsha aryzdanady. Sonyń ishinde sottardyń ádiletsiz sheshimderine qatysty aryzdar bar.
"Bireýdi mektepke, endi bireýdi ýniversitetke durys qabyldamaǵan. Osynyń bári baqylaýǵa alynyp, tiisti sheshimder qabyldanady. Ákimder naqty qandai shara qoldanǵanyn jazyp otyrady. Árine, olar úshin áleýmettik jelilerdi qarap otyratyn prezidentpen jumys isteý qiyndaý. Men ony sezemin. Biraq ómirdiń talaby sol", - dep oiyn aiaqtady Toqaev.
