Densaýlyq saqtaý ministrliginiń burynǵy basshylyǵy ýaqyttyń jetkilikti bolǵanyna qaramastan, indetpen kúreske tiisti deńgeide ázirlene almady. Bul týraly Úkimettiń keńeitilgen otyrysynda Memleket basshysy Qasym-Jomart Toqaev aitty, dep habarlaidy Aqorda baspasóz qyzmeti.
«Densaýlyq saqtaý ministrliginiń burynǵy basshylyǵy ýaqyttyń jetkilikti bolǵanyna qaramastan, indetpen kúreske tiisti deńgeide ázirlene almady. Naýqastar sany jáne basqa da kórsetkishter boiynsha olardyń jasaǵan barlyq boljamdary qate boldy», - dedi Qasym-Jomart Toqaev.
Memleket basshysy DSM basshylyǵy jibergen taǵy bir kemshilikke toqtaldy.
«Biz jumystyń tásilderin únemi ózgerte beremiz. Burynǵy basshylyq aiaq astynan naýqastardy simptomdy jáne simptomsyz dep bólý kerek dep sheshti. Qazir bul ádistemeden bas tarttyq. Mine osyndai áreketter halyq arasynda kúmán týǵyzady»,- dedi QR Prezidenti.
Aita keteiik, videobailanys arqyly ótip jatqan jiynda Úkimet 2020 jyldyń alǵashqy jarty jyldyǵyndaǵy elimizdiń áleýmettik-ekonomikalyq damý qorytyndysy týraly esep berdi. Sondai-aq koronavirýsqa qarsy kúreske qatysty qabyldanǵan sharalar, Memleket basshysynyń Úkimettiń aldaǵy ýaqytta atqaratyn jumysynyń negizgi baǵyttary boiynsha bergen tapsyrmalary men mindetteri qarastyryldy.
Elimizdiń áleýmettik-ekonomikalyq damýynyń qorytyndylary men jyl sońyna deiin oryndaityn mindetter jóninde Premer-Ministr Asqar Mamin, aqsha-nesie saiasatyna qatysty sharalar týraly Ulttyq banktiń tóraǵasy Erbolat Dosaev, elimizdegi epidemiologiialyq ahýaldy jaqsartý jónindegi sharalar týraly Densaýlyq saqtaý ministri Aleksei Tsoi baiandama jasady.
