Búgin «Aqorda» rezidentsiiasynda birqatar shet memlekettiń jańadan taǵaiyndalǵan Tótenshe jáne ókiletti elshileriniń Qazaqstan Prezidenti Qasym-Jomart Toqaevqa senim gramotalaryn tapsyrý rásimi ótti, dep habarlaidy "Ult aqparat" Aqordaǵa silteme jasap.
Memleket basshysyna Belarýs Respýblikasynyń Elshisi Pavel Ýtiýpin, Finliandiia Respýblikasynyń Elshisi Soili Makelainen-Býhanist, Avstriia Respýblikasynyń Elshisi Villi Kempel, Majarstan Elshisi Mihai Matiash Galoshfai senim gramotalaryn tapsyrdy.
Qasym-Jomart Toqaev sheteldiń diplomatiialyq missiiasy basshylarymen áńgimelesý barysynda atalǵan tórt memlekettiń barlyǵymen Qazaqstannyń qarym-qatynasy jaqsy jáne túrli salalardaǵy yqpaldastyq deńgeii joǵary ekenin atap ótti. Osyǵan bailanysty Prezident memleketter arasyndaǵy tiimdi yntymaqtastyqtyń odan ári dami beretinine senim bildirdi.
– Sizder Eýropanyń tórt memleketiniń ókilisizder. Elimizdiń Syrtqy saiasi tujyrymdamasynda Eýropamen aradaǵy qarym-qatynastarǵa erekshe mán berildi. Eýropa Qazaqstanda saiasi, ekonomikalyq yntymaqtastyq jáne investitsiia tartý isi boiynsha mańyzdy ról atqarady. Yntymaqtastyǵymyz odan ári jalǵasa beredi dep oilaimyn. Qazaqstan men sizderdiń elderińiz arasyndaǵy yqpaldastyqqa qosymsha serpin berýimiz qajet, – dedi Memleket basshysy.
Prezident koronavirýs pandemiiasyna bailanysty memlekettiń meilinshe kúrdeli kezeńdi bastan ótkerip otyrǵanyn aitty.
– Biz qazirgi jaǵdaida ekijaqty qatynastarǵa da, jahandyq ólshemge de áser etetin jańa kún tártibin qarastyrýymyz kerek. Biz COVID-19 pandemiiasynyń qiyndyqtary men saldaryn eńserý úshin osy salada ózara tyǵyz yqpaldastyq ornatamyz dep úmittenemin, – dedi Qasym-Jomart Toqaev.
Memleket basshysy óziniń Qazaqstan halqyna arnaǵan jylsaiynǵy Joldaýynda elimizdi jańǵyrtý, qoǵamdyq ómirdi demokratiialandyrý máselelerin qozǵaǵanyn atap ótip, diplomattardy atalǵan saladaǵy bailanystardy nyǵaitýǵa tiisti deńgeide mán berýge shaqyrdy.
– Ózara túsinistikti nyǵaitý úshin elimizdiń Úkimetine de, ózderińizdiń úkimetterińizge de kómektesesizder dep úmittenemin. Qazirgi ýaqytta bul asa mańyzdy. Kóptegen memleketterdiń arasyndaǵy osyndai ózara túsinistiktiń joqtyǵy halyqaralyq qatynastardyń shielenisýine alyp keledi. Máseleniń máni osynda, – dedi Memleket basshysy.
Qasym-Jomart Toqaev elshilerdi Qazaqstandaǵy diplomatiialyq missiialarynyń resmi túrde bastalýymen quttyqtap, olardyń ekijaqty qatynastardy ári qarai nyǵaitý isine tabys tiledi. Sonymen qatar óziniń áriptesterine – Belarýs, Finliandiia, Avstriia jáne Majarstan memleketteriniń basshylary men úkimetteriniń jetekshilerine júrekjardy sálemin joldady.
