Táýelsizdik ultymyzdyń baǵa jetpes bailyǵy. Bul týraly búgin Aqordada birqatar azamatqa memlekettik nagradalardy tapsyrý barysynda Memleket basshysy Qasym-Jomart Toqaev aitty, dep habarlaidy QazAqparat tilshisi.
«Eń aldymen, barshańyzdy elimizdiń basty merekesi – qasietti Táýelsizdik kúnimen shyn júrekten quttyqtaimyn! Mereili memleket bolǵanymyzǵa 28 jyl toldy. Bul – tarihi úderisterimizdiń bastaýy, uly meiram. Búkil elimiz úshin munan asqan aitýly kún, mańyzdy mereke joq. Táýelsizdik ultymyzdyń baǵa jetpes bailyǵy. Bizdiń býyn Elbasy Nursultan Nazarbaevtyń sarabdal saiasatynyń arqasynda halqymyzdyń asqaq armanyn aqiqatqa ainaldyrdy. Bairaqty babalarmyz bizge ulan-baitaq jerdi mura etip qaldyrdy. Olardyń amanatyna adal bolý – barshamyzdyń kieli paryzymyz. Azattyq úshin alysyp, el úshin jan pida etken batyrlardyń erligi eshqashan umytylmaidy», - dedi Memleket basshysy.
Qazaqstan Prezidenti elimizdiń altyn dáýiri, derbes damýy egemendik alǵan kúnnen bastalǵanyn atap ótti.
«Kóptegen jetistikterge qol jetkizdik. Álem boiynsha 9-oryndaǵy jerimizdiń shekarasyn tolyq shegendedik. Búkil álem Táýelsiz Qazaqstandy senimdi seriktes retinde tanydy. Alataýdyń baýraiynan elordamyzdy Arqa tósine kóshirip, Esildiń jaǵasyna el qondyrdyq. Bas qalamyz asa mańyzdy halyqaralyq jiyndardyń ortalyǵyna ainaldy. Memlekettik jáne azamattyq institýttarǵa negizdelgen basqarý júiesin jetildirdik», - dedi Qasym-Jomart Toqaev.
Memleket basshysy osy jyldarda halyqtyń turmys sapasyn jaqsartý basty mindet bolǵanyn aitty.
«Qiyndyqqa toly alǵashqy jyldarda ekonomikada túbegeili reformalardy qolǵa aldyq. Sonyń arqasynda 28 jyl ishinde IJÓ absoliýtti ólshemde 16 esege ósip, 180 mlrd dollar boldy. Osy kórsetkish boiynsha Qazaqstan Ortalyq Aziia boiynsha kósh bastap keledi. Elimiz halyqaralyq ekonomikada óziniń laiyqty ornyn aldy. Bizge shetelden 330 mlrd dollar investitsiia tartyldy. Osynyń barlyǵy eń aldymen halqymyzdyń ál-aýqatyn arttyrýǵa baǵyttalǵan», - dedi QR Prezidenti.
.jpeg)