Prezident Qasym-Jomart Toqaev Qazaqstannyń halyq jazýshysy, Memlekettik syilyqtyń laýreaty Ábdijámil Nurpeiisovti 95 jasqa tolǵan mereitoiymen quttyqtap, jedelhat joldady. Bul týraly Aqordanyń resmi saitynda habarlandy.
«Sizdi egemen elimizdiń ádebieti men mádenietiniń órkendeýine ólsheýsiz úles qosqan asa kórnekti jazýshy, sóz óneriniń patriarhy retinde qadirleimiz. Qazaq qalamgerleri arasynan daralanyp shyǵyp, biregei tulǵa dárejesine kóterilgen Ózińizdi únemi maqtan etemiz»,– delingen jedelhatta.
Sonymen qatar jazýshynyń «Qan men ter», «Sońǵy paryz» romandary qazaq kórkem sóziniń altyn qazynasyna enip, álem ádebietinde ózindik orny bar rýhani qundylyqqa ainalǵany jaiynda da aitylǵan. Jazýshynyń jalpyadamzattyq máselelerdi arqaý etken shyǵarmalary arqyly halqymyzdy búkil dúniejúzi tanyǵanyna da toqtalǵan.
«Barshany alańdatqan Araldyń ahýaly Sizdiń qaitalanbas týyndylaryńyzda kórinis tapty. El múddesin jahandyq deńgeige jetkizip, oqyrmannyń sheksiz yqylasyna bólenip kelesiz»,– dep jazdy Memleket basshysy.
Prezident mereitoi iesine «Jazýshylyq jolyńyz, ǵibratty ǵumyryńyz jalǵasa bersin! Sizge zor densaýlyq, shyǵarmashylyq tabys, baq-bereke tileimin» degen yqylasyn bildirdi.
