Abaidy óz zamanyndaǵy iskerliktiń uiytqysy, eńbekqorlyqtyń motivatory deýge bolady.
Bul týraly Memleket basshysy Qasym-Jomart Toqaevtyń «Abai jáne HHI ǵasyrdaǵy Qazaqstan» atty maqalasynda jazylǵan.
Avtor onda Abai shyǵarmashylyǵyna arqaý bolǵan taqyryptyń biri – masyldyqpen kúres ekenin aitady.
«Aqyn únemi ýaiymsyz salǵyrttyqqa, oiyn-kúlkige salynbai, sergek bolýǵa úndeidi. Ony udaiy eńbek arqyly shyńdap otyrýdy qup kóredi. Sonymen qatar, oryndy árekettiń ýaiym-qaiǵyny jeńetinin dáleldep, masyldyqpen kúrestiń psihologiialyq qyrlaryna tereń boilaidy. Qazir biz kóp aityp júrgen emotsionaldy intellektige de sol tusta nazar aýdardy. Maqtan men masyldyq psihologiiadan arylyp, qairattanyp eńbek etýdi, talaptanyp bilim izdeýdi nasihattaǵan»,-dep jazady Memleket basshysy.
Sondai-aq Prezidenttiń jazýynsha, Abai óleńderindegi «Eńbek etseń erinbei, Toiady qarnyń tilenbei», «Tamaǵy toqtyq, Jumysy joqtyq, Azdyrar adam balasyn», «Ózińe sen, ózińdi alyp shyǵar, Eńbegiń men aqylyń eki jaqtap» – degen qazynaly oilar bárimizge jaqsy tanys. Ár adam osy túiindi tujyrymdardy sanasyna berik toqyp, óziniń tynymsyz, adal eńbegimen ainalasyna úlgi bolýy kerek.
«Halqymyz eńbektiń qadirin biledi. Biz ata-analarymyzdyń tyldaǵy aýyr eńbegi jeńiske jetelegen orasan kúshke ainalǵanyn umytqan joqpyz. Qazir de qarapaiym eńbek adamdarynyń úlgili isteri jeterlik. Jaqynda solardyń birazy memlekettik nagradalarmen marapattaldy. Eń bastysy, búgingidei beibit kezeńde ár azamat óziniń eseli eńbegi elimizdiń ekonomikasyn ilgeriletýge tikelei yqpal etetinin túsinýi qajet»,-deidi Qasym-Jomart Toqaev maqalasynda.
Sondai-aq Memleket basshysynyń jazýynsha, Abaidy óz zamanyndaǵy iskerliktiń uiytqysy, eńbekqorlyqtyń motivatory deýge bolady. Uly oishyl shyǵarmalarynda kásipten násip tapqandardy, sharýaqorlyqqa úirený daǵdylaryn úlgi etedi. Ol turmys sapasyn jaqsartý úshin eńbek etýdiń jańa tásilderin meńgerýge shaqyrady. Sonymen qatar aqyn bastamashyldyqty, kásiptegi adaldyqty joǵary qoiady. Mysaly, óziniń onynshy qara sózinde «Erinbei eńbek qylsa, túńilmei izdese, ornyn taýyp istese, kim bai bolmaidy?», – dep tujyrym jasaidy.
Abaidyń oiynsha, tabys tabý úshin qolóner úirený kerek. Sebebi «mal jutaidy, óner jutamaidy» (otyz úshinshi qara sóz).
«Uly aqynnyń bul oilary búgingi Qazaqstan qoǵamy úshin de ózekti dep sanaimyn. Sondyqtan biz búgingi tańda shikizatqa táýeldilik psihologiiasynan arylýdy, shaǵyn jáne orta biznesti barynsha órkendetýdi negizgi basymdyqtyń biri retinde belgilep otyrmyz»,-delingen maqalada.
