Foto: Aǵybai Aiapbergenov/ Kazinform
QR Premer-ministri Oljas Bektenov Qazaqstannyń áielder qaýymyn 8 naýryz Halyqaralyq áielder kúnimen quttyqtady, dep habarlaidy Úkimettiń baspasóz qyzmeti.
Aiaýly analar! Qurmetti arýlar! Sizderdi 8 naýryz – Halyqaralyq áielder kúnimen shyn júrekten quttyqtaimyn!
Halqymyzda «Izgilik ataýlynyń bári kúnniń nury men ananyń aq sútinen jaralǵan» degen danalyq sóz bar. Ana – ómirdiń ózegi, tirshiliktiń bastaý bulaǵy, sheksiz meiirimniń qainary. Ár shańyraqtyń uiytqysy, jer betindegi jaqsylyq pen ádemiliktiń asyl táji – áielder qaýymy ulaǵatty urpaq ósirip qana qoimai, elge degen shynaiy janashyrlyqtyń úlgisin kórsetip keledi. Bilim berý men densaýlyq saqtaý, aýyl sharýashylyǵy men ónerkásip, biznes pen sport, qoǵamdyq ómirdiń jáne basqa da san túrli salasynda júrgen aiaýly jandardyń eńbegi sheksiz qurmetke laiyq. Bul oraida, Prezidentimiz Qasym-Jomart Kemeluly Toqaev atap ótkendei, otbasy institýtyn nyǵaitý, áielderdi qoldaý memlekettik saiasattyń asa mańyzdy basymdyǵy bolyp qala bermek.
Barshańyzǵa myqty densaýlyq, baqytty ǵumyr, eńbekterińizge tolaiym tabys tileimin.
Kóktemniń shýaqty kúnindei sáýleli sátterińiz kóp bolsyn!
Osyǵan deiin Qasym-Jomart Toqaevtyń qazaqstandyq arýlardy 8 naýryz – Halyqaralyq áielder kúnimen quttyqtaǵanyn jazdyq.
