QR Premer-Ministri Asqar Maminniń tóraǵalyǵymen ótken Investitsiialyq shtab otyrysynda 2021 jylǵy qańtar-mamyrdaǵy investitsiialardy tartý boiynsha atqarylǵan jumystyń qorytyndy kórsetkishteri qaraldy, dep habarlaidy "Ult aqparat" primeminister.kz saityna silteme jasap.
Ulttyq ekonomika ministri Áset Erǵaliev osy jyldyń 5 aiynda taý-ken óndirisi ónerkásibin qospaǵanda, negizgi kapitalǵa salynǵan investitsiialar kólemi 25,5% deńgeiinde óskenin aitty.
Ministr biylǵy 5 aidyń nátijeleri boiynsha QR ekonomikasynyń qalpyna kelý traektoriiasyna shyǵýy aiasynda negizgi kapitalǵa salynǵan investitsiialar aǵynynyń joǵary qarqyny qurylys (+132%), óńdeý ónerkásibi (+82%), aqparat jáne bailanys (+55%), aýyl sharýashylyǵy (+47%), saýda (+49%), jyljymaityn múlik operatsiialary (+30%), kólik jáne qoimalaý (+20%) sekildi salalarda baiqalǵanyn atap ótti.
Óńdeý sektorynyń qurylymynda himiia ónerkásibine investitsiialardyń ósýi 130 mlrd teńgeni (+427%), metallýrgiiaǵa 50 mlrd teńgeni (+41%) jáne t. b. qurady.
Negizgi kapitalǵa salynǵan investitsiialar boiynsha oń ósim qarqynyna 15 óńirde jáne respýblikalyq mańyzy bar qalalarda qol jetkizildi. Kósh bastap turǵan óńirler Túrkistan (+39,1%) jáne Pavlodar (+38,5%) oblystary, Almaty (+36,1%), Nur-Sultan (+34,8%) jáne Shymkent (+25,6%) qalalary, Soltústik Qazaqstan (+24,6%), Jambyl (+24,3%) jáne Qaraǵandy (+21,6%) oblystary boldy. Artta qalýshylyq Batys Qazaqstan (-36,4%) jáne Atyraý (-35%) oblystarynda baiqalady.
Atyraý oblysynyń ákimi Mahambet Dosmuhambetov 2021-2025 jyldarǵa ákimdik AÓK, jańartylatyn energetika, farmatsevtika, munai-gaz himiiasy ónerkásibi, týrizm, bilim berý jáne t. b. salalarda 12 myńnan astam jumys ornyn qura otyryp, jalpy somasy 10,1 trln teńge bolatyn 110 investitsiialyq jobadan turatyn pýl qalyptastyrǵanyn baiandady. Biyl óńirde investitsiialyq jobalardy iske asyrýǵa 3,8 trln teńge investitsiia tartý josparlanǵan. Osy jyldyń 5 aiynda negizgi kapitalǵa salynǵan investitsiialar kólemi 1 trln teńgeni qurady.
Qyzylorda oblysynyń ákimi Gúlshara Ábdiqalyqova aldaǵy 5 jylǵa ákimdik AÓK, kólik, jańartylatyn energetika, jeńil ónerkásip, tsifrlandyrý, densaýlyq saqtaý, TMK jáne t. b. salalarda 889 mlrd teńge somasyna 177 jobadan turatyn pýl qalyptastyrǵanyn atap ótti. Qazirgi ýaqytta jalpy quny 476 mlrd teńge bolatyn 132 joba iske asyrylýda. Osy jyldyń sońyna deiin jalpy quny 56 mlrd teńge bolatyn, óńirdiń 10 negizgi investitsiialyq jobasynyń 6-yn paidalanýǵa berý josparlanǵan, atap aitsaq – shyny zaýyty, as tuzyn óndirý, qus fabrikasy, jońyshqa ósirý, túie sútinen qurǵaq untaq óndirý, kún elektr stantsiiasy (osy jylǵy naýryz aiynda paidalanýǵa berildi).
Úkimet basshysy barlyq memlekettik organǵa, óńirlerdiń ákimdikterine jáne kvazimemlekettik sektor sýbektilerine ishki jáne syrtqy investitsiialardy tartý jumysyn júieli negizde jalǵastyrýdy tapsyrdy.
