Búgin «Astana» halyqaralyq qarjy ortalyǵynyń resmi ashylýy aiasynda QR Premer-Ministri Baqytjan Saǵyntaev Oppenheimer qorynyń basqarýshy direktory Djon Tonellimen jáne Islam damý bankiniń prezidenti doktor Bandar Mohammed Hamza Hadjarmen kezdesti, dep habarlaidy "Ult aqparat" primeminister.kz silteme jasap.
Kezdesýler barysynda Qazaqstandaǵy investitsiialyq jobalardy qarjylandyrý turǵysynan odan ári yntymaqtastyq máseleleri talqylandy, sondai-aq halyqaralyq biznes úshin keńeitilip jatqan múmkindikter qaraldy.
Islam damý bankiniń prezidenti doktor Bandar Mohammed Hamza Hadjarmen kezdesýde ekonomikanyń basym sektorlarynda, onyń ishinde aýyl sharýashylyǵy, infraqurylymdyq jobalar, sondai-aq ǵylym men tehnologiialardy damytý salalarynda ózara is-qimyldy nyǵaitý keleshegi qaraldy.
1995 jyly Islam yntymaqtastyǵy uiymyna qosylǵannan keiin Qazaqstan Islam damý bankiniń múshesi boldy. 2012-2015 jyldary Qazaqstan aýmaǵynda IDB óziniń TMD aýmaǵyndaǵy alǵashqy Eldik strategiiasyn júzege asyrdy, bul el ekonomikasyna, atap aitqanda, saýdany qarjylandyrý, jekemenshik sektordy damytý jáne saqtandyrý salalaryna shamamen $650 mln tartýǵa jol ashty. Búgingi tańda bank jalpy somasy $1,874 mlrd quraityn 67 jobany maquldady. IDB qoldaýdyń negizgi baǵyttary: kólik infraqurylymyn damytý (jalpy operatsiialar somasynyń 55,8%), aýyl sharýashylyǵyn damytý (23,3%), shaǵyn jáne orta biznesti jáne qarjy sektoryn damytý (19%), bilim berý (1%), densaýlyq saqtaý (0,8%), aqparattyq-kommýnikatsiialyq tehnologiialar, sanitarlyq baqylaý jáne qala qyzmetteri.
Kezdesýge qatysýshylar Qazaqstannyń IDB-men yntymaqtastyǵynyń keńeiýine Astanada AHQO bazasynda Halyqaralyq islam saýda-qarjy korporatsiiasy (ITFC) ókildiginiń ashylýy yqpal etetinin atap ótti.
Doktor Bandar Mohammed Hamza Hadjar QR-nyń ITFC-ke qosylýy ulttyq eksportty jáne ózara saýdany jetildirýge yqpal etetinin, sondai-aq Qazaqstanǵa IYU-ǵa múshe elder retindegi jańa quraldar men turaqty qarjy kózderin, naryqtardy qamtamasyz etetinin málimdedi. Budan ózge, bul Qazaqstanǵa IYU elderimen ózara saýda-sattyqta qundy tájiribe alýǵa, sonymen qatar ITFC tehnologiialary men jinaqtalǵan tájiribeni daiyn ónim eksportyn damytýǵa baǵyttaýǵa jol ashady.
Oppenheimer qorynyń direktory D. Tonellidiń Baqytjan Saǵyntaevpen kezdesýi barysynda kompaniianyń «Samuryq-Qazyna» UÁQ jekeshelendirý baǵdarlamasyna qatysýy, infraqurylymdyq qor qurý, sondai-aq qazaqstandyq kompaniialardy sheteldik kapital naryqtaryna shyǵarý máseleleri qaraldy.
Oppenheimer - investorlarǵa, jeke tulǵalarǵa, kásiporyndarǵa jáne mekemelerge qarjy qyzmetteri men keńester beretin jetekshi investitsiialyq bankterdiń biri jáne kópbeiindi investitsiialyq kompaniia.
Eske sala ketsek, QR Prezidentiniń 2018 jyldyń qańtar aiynda AQSh-qa resmi sapary aiasynda Oppenheimer qory men «Kazakh Invest» UK arasynda infraqurylymdyq jobalardy qarjylandyrý jáne uzaq merzimdi nesielendirý úshin infraqurylymdyq qor qurý týraly memorandýmǵa qol qoiyldy.
