QR Premer-Ministri Asqar Mamin Parlament palatalarynyń birlesken otyrysyna qatysty, onda Úkimettiń 2018 jylǵy respýblikalyq biýdjettiń oryndalýy týraly esebi qabyldandy, dep habarlaidy "Ult aqparat" primeminister.kz saityna silteme jasap.
2018 jylǵy respýblikalyq biýdjettiń oryndalýy týraly baiandai otyryp, QR Premer-Ministriniń birinshi orynbasary – qarjy ministri Álihan Smaiylov 2018 jyldyń biýdjettik saiasaty memlekettik qarjynyń turaqtylyǵyn nyǵaitýǵa jáne ekonomikany odan ári damytýǵa baǵyttalǵanyn atap ótti.
Biýdjet qarajattaryn jumsaýdyń basym baǵyttary — ekonomikanyń naqty sektoryn qoldaý, jumys oryndaryn saqtaý jáne áleýmettik salany damytý boldy. 2018 jyldyń qorytyndysy boiynsha ekonomika ósimi 4,1% qurady. Biýdjetke 8,8 trln teńge túsim tústi. Shyǵystar boiynsha oryndalýdyń joǵary paiyzy qamtamasyz etildi – 99,8%.
«Biýdjettiń áleýmettik baǵyttylyǵy saqtaldy. Atalǵan maqsattarǵa barlyq shyǵyndardyń jartysyna jýyǵy paidalanyldy, iaǵni bul – 4,3 trln teńge. Áleýmettik kómek pen áleýmettik qamsyzdandyrýǵa 2,6 trln teńge bólindi. Biýdjetten 3 mln 530 myń adamǵa zeinetaqy men járdemaqylar tólendi», — dedi Á. Smaiylov.
Otyrys barysynda QR Parlamenti Senatynyń depýtaty S. Plotnikov, QR Parlamenti Májilisiniń depýtaty Q. Jabaǵiev memlekettik baǵdarlamalardy iske asyrý, respýblikalyq biýdjetti atqarý, sondai-aq, otandyq avtoónerkásipti damytý máselelerin qozǵady.
QR Premer-Ministri A. Mamin biýdjetti josparlaýdyń tiimdiligin odan ári arttyrý jáne tolyqtai igerýdi qamtamasyz etý maqsatynda osy jyldyń sońyna deiin engiziletin birqatar reforma daiyndalyp jatqanyn atap ótti.
Avtoónerkásipti damytýǵa qatysty, QR Úkimetiniń basshysy osy jyldyń bes aiynyń qorytyndysy boiynsha avtoónerkásiptiń 46%-ǵa óskenin málimdedi. Búginde avtoónerkásip salasy Qazaqstanda ekonomikanyń negizgi draiverine ainalýda. Ótken jyly 30 myńǵa jýyq avtokólik shyǵaryldy, biyl 50 myńnan astam avtokólik shyǵarý kózdelgen.
2021 jylǵa qarai jergiliktendirý deńgeiin 50% deiin jetkizý jumystary júrgizilýde. Avtonesielendirý aiasynda qoljetimdilikti arttyrý maqsatynda ótken jyly 3 myńǵa jýyq avtokólik qarjylandyryldy.
Biyl Ulttyq Bankpen birlesip nesielendirý kólemin 15 myń avtomobilge deiin jetkizý josparlanǵan. Otandyq avtomobilderdi satyp alý boiynsha nesielendirý kólemi bes esege arttyrylady.
«Bul óndiristi damytý úshin tiisti serpin beredi, al Qazaqstan azamattary avtokólik satyp alý úshin jeńildikpen qarjy quralyna ie bola alady. Bul jerdegi dinamika jaqsy, ony arttyratyn bolamyz», — dep jaýap berdi Premer-Ministr.
Otyrys sońynda Premer-Ministr A. Mamin depýtattarǵa birlesken tiimdi jumysy, Úkimettiń 2018 jylǵy respýblikalyq biýdjettiń oryndalýy týraly esebin tyńdaý boiynsha ashyq ári syndarly usynystary úshin alǵys bildirdi.
«Depýtattar kótergen barlyq saýaldar, eskertýler men usynystar boiynsha naqty jumystar uiymdastyrylady. Qajetti sharalar shuǵyl qabyldanady», — dedi A. Mamin.
Sonymen qatar QR Parlament Palatalarynyń birlesken otyrysynda 2018 jylǵy respýblikalyq biýdjettiń oryndalýyn baqylaý jónindegi Esep komitetiniń esebi jariialandy.
Esep komitetiniń tóraǵasy Natalia Godýnova 2018 jyly respýblikalyq biýdjettiń oryndalýy Úkimettiń Parlament pen Esep komitetiniń ótken jylǵy usynystaryn eskerýmen biýdjet protsesinde júrgizgen aýqymdy ózgeristeriniń aiasynda ótkenin aitty.
«Ótken jylǵy qarastyrý qorytyndysy boiynsha Esep komitetiniń Úkimet pen memlekettik organdarǵa bergen usynystar qatarynan 72%-y iske asyrylǵan jáne oryndalý satysynda, bul biýdjettiń oryndalýy boiynsha jaǵdaidy jaqsartýǵa septigin tigizdi. Biýdjetke 2 ese az túzetýler engizildi, biýdjet qarajatyn tiimsiz paidalaný 4 esege derlik tómendedi, oń dinamika nyǵaidy», — dedi N. Godýnova.
