Búgin QR Ortalyq sailaý komissiiasy «Halyq demografiiasy» qoǵamdyq birlestiginen prezidenttikke úmitker retinde usynylǵan Jumatai Álievti kandidat retinde tirkeýden bas tartty, dep habarlaidy QazAqparat tilshisi.
QR OSK múshesi Lázzat Súleimenniń aitýynsha, aǵymdaǵy jylǵy 28 sáýirde Ortalyq sailaý komissiiasyna «Halyq demografiiasy» qoǵamdyq birlestiginiń Jumatai Álievti Qazaqstan Respýblikasynyń Prezidenttigine kandidat retinde usynǵany týraly qujattary tapsyrylǵan.
«2019 jylǵy 2 mamyrda Ortalyq sailaý komissiiasynda Jumatai Álievtiń memlekettik tildi erkin meńgergendigin anyqtaý jónindegi lingvistikalyq komissiianyń otyrysy ótti. Lingvistikalyq emtihan barlyq belgilengen kezeńder boiynsha tolyqqandy ótkizildi. Ótkizilgen emtihannyń nátijeleri boiynsha lingvistikalyq komissiia Qazaqstan Respýblikasynyń Prezidenttigine kandidat Jumatai Álievtiń memlekettik tildi erkin meńgermegendigi jóninde sheshim qabyldady jáne 2 mamyr kúngi lingvistikalyq komissiianyń №9 hattamasy shyǵaryldy», - dedi OSK múshesi.
Onyń atap ótýinshe, Jumatai Álievtiń memlekettik tildi erkin meńgermegeni týraly emtihan nátijesin eskere otyryp, Konstitýtsiia men Sailaý týraly Konstitýtsiialyq zańda prezidenttikke kandidatqa qoiylatyn talaptarǵa sáikes emestigi týraly hattama jobasy daiyndalǵan. Hattama jobasynda prezidenttike kandidat Jumatai Álievtiń Konstitýtsiianyń 41-baby 2-tarmaǵyna, «Qazaqstan Respýblikasyndaǵy sailaý týraly» Konstitýtsiialyq zańnyń 54-babynyń memlekettik tildi erkin meńgerý bóliginde belgilengen talaptarǵa sáikes emes ekendigi kózdelgen.
Osy másele boiynsha Ortalyq sailaý komissiiasynyń qaýlysy ázirlenip, daýys berýge shyǵarylyp otyr. Jobanyń 1-tarmaǵy Qazaqstan Respýblikasynyń Prezidenttigine kandidat Jumatai Álievtiń Qazaqstan Respýblikasy Konstitýtsiiasynyń jáne «Qazaqstan Respýblikasyndaǵy sailaý týraly» Konstitýtsiialyq zańynyń talaptaryna sáikes emes ekenin kózdeidi. Qaýly jobasynyń 2-tarmaǵy Jumatai Álievti Qazaqstan Respýblikasynyń Prezidenttigine kandidat retinde tirkeýden bas tartýdy kózdeidi», - dedi L.Súleimen.
Osydan keiin QR Ortalyq sailaý komssiiasynyń músheleri qaýly jobasyn biraýyzdan qoldap qol qoidy.
