QR Ortalyq sailaý komissiiasy 2019 jyldyń 9 maýsymynda ótken kezekten tys prezident sailaýynyń qorytyndysyn shyǵardy, dep habarlaidy "Ult aqparat".
Sailaýshylardyń basym bóliginiń senimine ie bolǵan Qasym-Jomart Toqaev Qazaqstan Prezidenti bolyp sailandy. Ekinshi orynǵa "Ult taǵdyry" qozǵalysy atynan sailaýǵa túsken Ámirjan Qosanov, al úshinshi orynǵa "Aq jol" demokratiialyq partiiasynyń kandidaty, jalǵyz áiel úmitker Daniia Espaeva jaiǵasty.
Ortalyq sailaý komissiiasynyń málimetterine sáikes, Jambyl Ahmetbekov 167 649 daýys nemese sailaýshylardyń jalpy daýysynyń 1,82 protsentin, Daniia Espaeva 465 714 daýys nemese barlyq sailaýshy daýysynyń 5,05 protsentin, Ámirjan Qosanov 1 495 401 daýys, iaǵni barlyq sailaýshy daýysynyń 16,23 protsentin, Tóleýtai Rahymbekov 280 451 daýys nemese jalpy sailaýshy daýysynyń 3,04 protsentin aldy.
"Sondai-aq Amangeldi Taspihovqa 182 898 daýys berildi, bul daýys berýge qatysqan sailaýshylardyń 1,98 protsenti, Qasym-Jomart Toqaevqa 6 539 715 daýys nemese sailaýshylardyń 70,96 protsenti daýysyn berdi. Sádi-Bek Túgel 84 542 daýys nemese sailaýshylardyń jalpy sanynyń 0,92 protsentiniń daýysyn aldy», - dedi QR OSK múshesi Lázzat Súleimen.
Aita keteiik, Qasym-Jomart Toqaevqa eń kóp daýysty Almaty oblysynyń, al eń az daýysty Mańǵystaý oblysynyń turǵyndary bergen.
Ulyqtaý rásimi qashan ótedi?
Lázzat Súleimen habarlaǵandai, Qazaqstan prezidentin ulyqtaý rásimi 12 maýsymda ótedi, dep jazady Sputnik agenttigi.
Ortalyq sailaý komissiiasynyń múshesi Respýblika Prezidenti bolyp daýys berýge qatysqan sailaýshylardyń 50 paiyzynan artyq daýys alǵan kandidat tanylatynyn atap ótti. Osy normaǵa sáikes, Ortalyq sailaý komissiiasynyń músheleri Qasym-Jomart Toqaevty Qazaqstan Respýblikasynyń sailanǵan prezidenti retinde tanyp, tirkeý týraly qaýly qabyldady.
"Qazaqstan Respýblikasynyń Prezidenti týraly konstitýtsiialyq zańǵa sáikes Ortalyq sailaý komissiiasynyń tóraǵasy sailanǵan prezidentke Qazaqstan Respýblikasy Prezidentiniń kýáligin tapsyrady. Konstitýtsiianyń osy normasyn basshylyqqa ala otyryp, 9 maýsym kúni sailanǵan Qasym-Jomart Toqaevqa Qazaqstan Respýblikasy Prezidentiniń kýáligin tapsyrý usynylady. Sonymen qatar, zańǵa sáikes Prezident kezekten tys sailaýda sailansa, ant berý kúnin Ortalyq sailaý komissiiasy anyqtaidy. Osyǵan súiene otyryp, Qasym-Jomart Toqaevtyń ant berý kúni 2019 jylǵy 12 maýsym bolyp aiqyndalsyn", - dedi Súleimen.
Budan buryn sheteldik jáne otandyq BAQ ókilderimen ótken baspasóz máslihatynda Qasym-Jomart Toqaev ta ulyqtaý rásimi sársenbide ótetinin málimdegen edi.
Zań boiynsha jańadan sailanǵan Qazaqstan Prezidentin ulyqtaý rásimi daýys berý qorytyndysy jariialanǵan kúnnen bastap bir ai ishinde ótkizilýi tiis.
Daýys berýge qansha qazaqstandyq qatysty?
Lázzat Súleimenniń aitýynsha, sailaý biýlletenderin alǵan sailaýshylardyń sany – 9 274 466 nemese sailaýshylardyń jalpy sanynyń 77,5 protsenti.
"Daýys berýge qatysqan sailaýshylardyń sany – 9 274 034. Onyń ishinde daýys berý quqyǵyn beretin esepten shyǵarý kýálikteri boiynsha daýys berýge qatysqan sailaýshylardyń sany 22 427 nemese barlyq sailaýshynyń 0,19 protsenti", - dedi ol.
Sondai-aq, OSK aqparatynsha, jaramsyz dep tanylǵan sailaý biýlletenderiniń sany 71 624 nemese barlyq biýlletenniń 0,59 protsenti. Joiylǵan biýlletenderdiń sany – 793 010.
Daýys berýge kelgen sailaýshylar sany jaǵynan Almaty oblysy – 89%, Aqtóbe oblysy – 84,9%, Shyǵys Qazaqstan oblysy – 84,9% kósh bastady.
Aita ketsek, 2015 jyly ótken prezident sailaýynda saǵat 22:00-degi málimet boiynsha qazaqstandyqtardyń 95,11%-i daýys bergen edi.
