Elordada J. Táshenov jáne Amman kósheleriniń qiylysynda Jambyl Jabaevtyń eskertkishine gúl shoǵyn qoiý rásimi ótti, dep habarlaidy QazAqparat.
Sharaǵa QR Memlekettik hatshysy Qyrymbek Kósherbaev, Mádeniet jáne sport ministri Aqtoty Raiymqulova, Nur-Sultan qalasynyń ákimi Altai Kólginov, aqyn-jazýshylar, jambyltanýshylar jáne qoǵam qairatkerleri qatysty.
Sonymen birge, Jambyl oblysynan arnaiy delegatsiia keldi. Aqynnyń aty berilgen oblysta da mereitoiǵa arnalǵan úlken keshendi jospar bar.
«Búgingi sharanyń jastarǵa úlken tárbielik máni bar. Ádette Jambyl Jabaev kim degende, aqyn, jyraý, aitysker dep aitamyz. Onymen shektelýge bolmaidy. Mysaly byltyr Abai jyly bolǵanda Memleket basshysy «Abai jáne HHI ǵasyr» maqalasynda Abaidy aqyn retinde ǵana emes, oishyl, filosof, ǵalym retinde kórsetý keregin aitty. Jambyl Jabaevty da jai ǵana aitysker emes, úlken qairatker retinde kórsetý mańyzdy. Mysaly Jambyl Jabaev – qazaq aýyz ádebiteiniń negizin qalaýshy, sol salada úlken orny bar. Ol qazaq aitysynyń áleýmettik-saiasi mánine basa nazar aýdarǵan tulǵa», - dedi Jambyl oblysy máslihatynyń hatshysy Mahmetqali Sarybekov tilshilerge bergen suhbatynda.
Aita keteiik, keshe Jambyl Jabaevtyń 175 jyldyq mereitoiyn daiyndaý jáne ótkizý jónindegi memlekettik komissiianyń alǵashqy otyrysy ótti. Mereitoilyq jyl ishinde respýblika boiynsha 500-ge jýyq áleýmettik, imidjdik, ǵylymi, tanymdyq is-sharalar ótkiziledi. Budan bólek, aqyn ómirinen derekti film túsirý, óleńderiniń jańa jinaqtaryn shyǵarý, aitystar men ádebi konkýrstardy, kitap kórmelerin uiymdastyrý, mereitoilyq moneta, poshta markasyn ázirleý jáne basqa da sharalar ótkizý kózdelip otyr.
