Qazaqstan Respýblikasy Úkimetiniń Qaýlysymen Shaimergenov Timýr Tólegenuly QR qorǵanys jáne aeroǵarysh ónerkásibi vitse-ministri bolyp taǵaiyndaldy, dep habarlaidy primeminister.kz.
Timýr Shaimergenov 1982 jyly Jambyl oblysynda dúniege kelgen. 2004 jyly Almaty q. Halyqaralyq mamandyqtar institýtyn támamdady, 2009 jyly QR Prezidenti janyndaǵy Qazaqstan strategiialyq zertteýler institýtynda saiasi ǵylymdar kandidatynyń ǵylymi dárejesin alý úshin dissertatsiia qorǵady.
2009-2017 jyldary Garvard, Oksford, Kembridj, Pensilvaniia, Kolýmbiia ýniversitetterinde jetekshi quramǵa arnalǵan oqý baǵdarlamasynan ótti.
Halyqaralyq qatynastar jáne qaýipsizdik, strategiialyq menedjment jáne táýekelderdi basqarý salasynda maman biliktiligine ie. Qazaq, orys, aǵylshyn tilderin meńgergen.
Eńbek jolyn 2004 jyly Ál-Farabi atyndaǵy Qazaq ulttyq ýniversitetinde bastaǵan, QR Prezidenti janyndaǵy Qazaqstan strategiialyq zertteýler institýtynda, QR Parlamenti Májilisi jáne QR Qaýipsizdik Keńesi apparattarynda túrli qyzmetter atqarǵan. QR Syrtqy ister ministrligi janyndaǵy Qoǵamdyq keńestiń múshesi.
QR Qorǵanys jáne aeroǵarysh ónerkásibi ministrligine qyzmetke taǵaiyndalmas buryn QR Prezidenti Ákimshiligi júiesinde jumys istegen.
«Qazaqstan halqy Assambleiasyna 25 jyl», «QR Konstitýtsiiasyna 20 jyl», «QR Diplomatiialyq qyzmetine 25 jyl», «QR Ulttyq qaýipsizdik komitetine 25 jyl» medaldarymen marapattalǵan.
