Qazaqstan Respýblikasynyń Qorǵanys ministri general-leitenant Nurlan Ermekbaev Máskeýdegi IX Halyqaralyq qaýipsizdik jónindegi konferentsiiaǵa qatysty, dep habarlaidy "Ult aqparat".
Konferentsiiany 2012 jyldan beri jyl saiyn Resei Federatsiiasynyń Qorǵanys ministrligi ótkizedi. Oǵan UQShU, ShYU, NATO-ǵa múshe elderdiń, Taiaý Shyǵys, Eýropa jáne Aziia elderiniń qorǵanys vedomstvolarynyń basshylary, halyqaralyq uiymdardyń basshylary, sondai-aq akademiialyq toptardyń ókilderi men úkimettik emes sektordyń sarapshylary qatysady. Qazaqstan ókilderi forýmda jyl saiyn ózekti taqyryptarǵa baiandamalar jasaidy.
Is-shara áskeri vedomstvolardyń ózara qarym-qatynasyn nyǵaitýǵa, jańa qaýip-qaýipterge qarsy is-qimyldyń birlesken joldaryn izdeýge baǵyttalǵan.
Konferentsiiaǵa qatysýshylar halyqaralyq áskeri saiasattyń, jahandyq jáne óńirlik qaýipsizdiktiń úrdisteri men máselelerin talqylady. Olardy sheshýdegi qorǵanys vedomstvolarynyń atqaratyn qyzmeti mańyzdy.
Qorǵanys ministri general-leitenant Nurlan Ermekbaev COVID-19 koronavirýs infektsiiasymen kúreste áskeri vedomstvonyń atqarǵan jumysy týraly baiandama jasady. Ol pandemiia kezinde elde áskerdi paidalanýdyń tájiribesimen bólisti.
Atap aitqanda, áskeri qyzmetshiler áleýmettik mańyzy bar obektiler men joldardy dezinfektsiialady. Blokpostarda qyzmet etti jáne eldi mekenderdi patrýldedi. Azamattyq densaýlyq saqtaý mekemelerine kómek kórsetý úshin dárigerlerden quralǵan brigadalar bólindi. Áskeri-meditsinalyq mekemeler qaita jabdyqtaldy. Áskeri-kólik aviatsiiasynyń kúshimen shetelden Qazaqstannyń azamattaryn ákeldi, sondai-aq áskerler men júkterdi tasymaldady. Zapastaǵy áskeri qyzmetshilerdiń arnaiy jiyndary ótti.
Atalǵan sharalarǵa barlyǵy 13 myńnan astam áskeri qyzmetshi jumyldyryldy. Sarapshylardyń aitýynsha, halyqtyń jalpy sanyna shaqqanda jumyldyrylǵan áskeri qyzmetshiler sany jaǵynan Qazaqstan álemde birinshi oryndardyń birin alady. Bul qazaqstandyq armiianyń koronavirýs infektsiiasynyń taralýyna qarsy is-qimylǵa qosqan eleýli úlesin kórsetedi.
Tótenshe jaǵdai kezeńinde is-qimyldar nátijeleri boiynsha uiymdastyrý sipatynda birqatar sheshimder qabyldandy. Atap aitqanda, radiatsiialyq, himiialyq, biologiialyq qorǵaý jáne ekologiialyq qaýipsizdik áskerleriniń departamenti quryldy. RHBQ áskerleri, áskeri meditsina, áskeri-kólik aviatsiiasynyń múmkindikteri kúsheitildi. «Qos maqsattaǵy» komponentterdiń múmkindikteri artyp, olar tek soǵysta ǵana emes, beibit ýaqytta da suranysqa ie boldy.
Osy oraida, Qarýly Kúshter azamattyq qorǵanys organdarynyń mindetterin oryndady. Elimizde tótenshe jaǵdailar ministrligi jumysyn qaita bastady.
Konferentsiiaǵa qatysýshylar Qazaqstan Respýblikasy Qarýly Kúshteriniń COVID-19 pandemiiasy kezeńindegi áreketterin joǵary baǵalady.
Qazaqstan qorǵanys vedomstvosynyń basshysy Qarýly Kúshterdegi jeke quramnyń densaýlyǵyn saqtaýda áskeri dárigerlerdiń joǵary kásibiligi men tiimdi jumysyn, sondai-aq olardyń pandemiia kezinde koronovirýsqa qarsy is-qimylǵa qosqan zor úlesin jeke atap ótti. El áskerinde ekpe salý jalǵasýda. COVID-19-ǵa qarsy qajetti deńgeide ujymdyq immýnitet qalyptasty.
Budan ózge, sapar aiasynda general-leitenant Nurlan Ermekbaev Máskeý oblysynda ornalasqan arnaiy maqsattaǵy áskeri bólimderdiń birin aralady. Ministr jaýyngerlik daiarlyqtyń barysymen jáne oqý-materialdyq bazasymen tanysty.
