Parlament palatalarynyń birlesken otyrysynda QR Konstitýtsiialyq Keńesiniń Respýblikadaǵy konstitýtsiialyq zańdylyqtyń jai-kúii týraly jyl saiynǵy joldaýy tyńdaldy, dep habarlaidy QazAqparat.
«Biylǵy jyl Qazaqstan Respýblikasy Memlekettik táýelsizdiginiń 30 jyldyǵymen erekshelenip otyr. Uly Dala eliniń derbes memlekettiligin qalyptastyrýdaǵy sheshýshi qadamdar elimizdiń Tuńǵysh Prezidenti-Elbasy NurSultan Nazarbaevtyń bastaýymen 1995 jyly 30 tamyzda Búkilhalyqtyq referendýmda qabyldanǵan qoldanystaǵy osy Konstitýtsiia aiasynda júzege asyryldy. Qazaqstan Respýblikasynyń Prezidenti Qasym-Jomart Toqaev atap ótkendei, «osynaý tolaǵai tabystardyń bárine Elbasynyń dara kóshbasshylyǵynyń hám halqymyzdyń danalyǵy men parasatynyń, birligi men yntymaǵynyń, otandastarymyzdyń qajyrly eńbeginiń arqasynda qol jetkizdik», - dedi Konstitýtsiialyq Keńestiń tóraǵasy Qairat Mámi.
Onyń aitýynsha, jaqynda bekitilgen Qazaqstan Respýblikasynyń 2025 jylǵa deiingi Ulttyq damý jospary, Qazaqstan Respýblikasynyń 2025 jylǵa deiingi jalpyulttyq basymdyqtary, Qazaqstan Respýblikasynda memlekettik basqarýdy damytýdyń 2030 jylǵa deiingi tujyrymdamasy tiisti mńndetterdi sheshýge qyzmet etedi. bekitildi. Bul qujattardy iske asyrý qazirgi kezeńniń syn-qaterlerin eńserýge baǵyttalǵan jáne orta merzimdi perspektivada, halyqtyń turmys sapasy men tabysynyń shynaiy artýymen qosa júretin, eldiń ornyqty jáne sapaly ekonomikalyq ósý jolyna baǵyt alýyn qamtamasyz etýge arnalǵan.
«Memlekettik egemendiktiń negizgi dińgekterin aiqyndaýda jáne iske asyrýda Konstitýtsiialyq Keńestiń sheshimderi mańyzdy ról atqarady. Konstitýtsiialyq Keńestiń qaýlylarynda eldiń konstitýtsiialyq qurylysynyń negizderi, adamnyń jáne azamattyń quqyqtary men bostandyqtaryn qorǵaý, Respýblika Prezidentiniń, Parlamenttiń, Úkimettiń mártebesi men ókilettikteri, bilik tarmaqtarynyń ózara qarym-qatynasy, zań shyǵarý protsesi, sottardyń jáne ózge de memlekettik organdardyń quzyreti men qyzmetiniń mazmundary jan-jaqty túsindirildi», - dedi Qairat Mámi.
Konstitýtsiialyq Keńes elde quqyqtyq memleket qaǵidattaryn nyǵaitý jóninde naqty usynystar engizdi.
«Konstitýtsiialyq Keńestiń sheshimderin oryndaý protsesi jalǵasýda. Respýblika Prezidenti málimdegen jáne júrgizip otyrǵan qoǵam men memleketti odan ári demokratiialandyrý baǵyty konstitýtsiialyq baqylaý organynyń rólin arttyrýdy jáne Konstitýtsiialyq Keńes týraly zańnamany jetildirýdi talap etedi.
Azamattardyń konstitýtsiialyq baqylaýǵa qol jetkizýin keńeitý qajet.
Bul baǵytta sottardyń Konstitýtsiialyq Keńeske ótinish jasaý tártibin, taraptardyń qoldanystaǵy zańnyń konstitýtsiialyǵyn tekserý týraly ótinishterin qaraý tártibin ońtailandyrý ózekti. Eýropa Keńesiniń Venetsiia komissiiasy bul máseleler boiynsha oń qorytyndysyn berdi», - dedi ol.
