QR Ádilet ministri Marat Beketaev elimizdiń Qaýipsizdik keńesi quzyretin kúsheitetin zań jobasyn qabyldaý qajettigine qatysty pikir bildirdi, dep habarlaidy "Ult aqparat" QazAqparatqa silteme jasap.
Atalǵan ministrliktiń keńeitilgen alqa májilisinen keiin Marat Beketaev BAQ ókilderine suhbat berdi. Jýrnalister Qaýipsizdik keńesi qyzmetiniń máselelerine arnalǵan zań jobasyna qatysty keibir sarapshylardyń «bilik tranzitine daiyndyq» úshin jasalyp jatyr degen pikirleri bar ekendigin aitty. Olar ministrden atalǵan máselege orai pikir bildirýdi surady.
«Men sarapshylardyń pikirimen kelispeimin jáne muny josparly jumys sanaimyn. Bizde konstitýtsiialyq reforma júrgizildi. Atalǵan konstitýtsiialyq reformanyń aiasynda Elbasynyń barlyq ýaqytta da Qaýipsizdik qyzmetin basqaratyndyǵy aiqyndalǵan. Bul fakti Elbasynyń airyqsha mártebege, halyqtyń airyqsha senimine ie ekendigin bildiredi. Buǵan qosa, qazirgi terrorizm men ekstremizm qaýpi bar kezde halyq úshin, turǵyndar úshin, elimiz úshin turaqtylyq faktory barynsha mańyzdy. Sondyqtan sóz elimizdegi turaqtylyqty qamtamasyz etetin mehanizmderdi kúsheitý jaiynda bolyp otyr», - dedi ministr.
Sonymen qatar Marat Beketaev Elbasynyń joǵary bedeliniń arqasynda elimiz óńirdegi turaqtylyqty da qamtamasyz etip otyrǵandyǵyn basa aitty.
Aita keteiik, taiaýda QR Parlamentiniń Májilisi Qaýipsizdik keńesi qyzmetiniń máseleleri jónindegi zań jobasyn qaraýyna alǵan bolatyn. Zań jobasyn elimizdiń Ádilet ministrligi ázirlegen.
