Qazaqstan eskirgen «qol» radarlarynan birtindep bas tartady. Bul týraly búgin halyqpen eseptik kezdesý ótkizgen QR Ishki ister ministri Qalmuhanbet Qasymov málim etti, dep habarlaidy QazAqparat.
«Jyl basynan bastap júrgizýshilerdi negizsiz toqtatýdy joiý jáne jol qozǵalysy erejesiniń saqtalýyn baqylaý jumystarynyń baǵyttylyǵyn qamtamasyz etý úshin politsiia avtomobilmen sholǵyndaýǵa kóshirildi. Buǵan deiin joldardy shamamen 13 myń politsiia sholǵyndaityn bolsa, qazir 2,2 myń avtosholǵynshy qyzmet etýde. Olardyń jumystary jol qozǵalysy erejesiniń buzylýynyń aldyn alýǵa jáne óreskel buzýshylyqtardyń jolyn kesýge baǵyttalǵan», - dedi ministr.
Sonymen qatar ol barlyq sholǵynshy avtomobilderdiń videotirkegishtermen, al politsiia qyzmetkerleri viedojetonmen qamtamasyz etilgendigin atap ótti.
«Munan bólek, aǵymdaǵy jyldyń basynan bastap IIM birte-birte eskirgen «qol» radarlarynan bas tartady. Olardyń ornyna politsiianyń qatysýynsyz buzýshylyqty anyqtaityn avtomatty radarlar satyp alynady. Buǵan qosa, buzýshylyq týraly aqparat júrgizýshige poshta arqyly keledi. Sonymen qatar qazirgi ýaqytta buzýshylyqtardy tirkeitin statsionarlyq avtomatty júiemiz jumys istep tur. Onyń tiimdiligi aiqyn», - dedi Qasymov.
Ministrdiń dereginshe, respýblika joldarynda 1,7 myńnan astam statsionarlyq baqylaý júiesi ornatylǵan. Olar 2016 jyly shamamen 900 myń jol qozǵalysy erejesiniń buzylýyn tirkegen.
«Osylaisha, biz jol qozǵalysyn «bailanyssyz» baqylaýǵa birtindep kóshemiz», - dedi ol.
