Tártip saqshylary Aqmola oblysynyń aýmaǵynda qoryqshyny óltirgenderdi áýeden jáne úsh oblys aýmaǵyndaǵy joldardan izdegen, dep habarlaidy "Ult aqparat" QR IIM baspasóz qyzmetine silteme jasap.
Ishki ister ministri Erlan Turǵymbaev málimdegeýinshe, inspektorlarǵa shabýyl jasaǵan qylmyskerlerdi anyqtaý jáne ustaý úshin elimiz boiynsha «Ustaý» jospary jariialanǵan. Qoldaǵy derekter barlyq aimaqtarǵa jóneltildi.
«Oqiǵa ornyna jaqyn ornalasqan Aqmola, Qostanai jáne Soltústik Qazaqstan oblystarynyń jeke quramy dereý kúsheitilgen qyzmetke kóshti.
Oblystyq jáne respýblikalyq mańyzy bar avtojoldarǵa blok-beketter qoiyldy, úsh oblystyń joldary boiymen jedel-izdestirý toptary jiberildi.
Izdestirý jumystaryna IIM TJK tikushaqtary, IIM Kriminaldyq politsiia departamentiniń jáne «Arlan» arnaiy bólimshesiniń qyzmetkerleri qatysty», dedi Ishki ister ministri Erlan Turǵymbaev.
Josparlanǵan is-sharalardyń nátijesinde kúdikti anyqtalyp, qamaýǵa alynǵan.
«Jedel-izdestirý sharalarynyń nátijesinde Arqalyq qalasynyń turǵyny kúdikti retinde anyqtalyp ustaldy. Sondai-aq, qylmys orynnan 20 shaqyrymdai jerden «Niva» markaly avtokólik tabyldy. Qazirgi ýaqytta kúdiktige qatysty tergeý amaldary júrgizilýde. Qylmys quraly men oq-dáriler tárkilendi. Birqatar kriminalistik saraptamalar taǵaiyndaldy. Bul qylmysqa basqa da qatysýshylardyń bar-joǵy tekserilýde», dedi Ishki ister ministri Erlan Turǵymbaev.
Qoryqshy Q.S. Nurtazinovtyń ólimine jáne qoryqshy S.K. Ospanovty óltirý áreketine bailanysty QR QK-niń 99-baby, 2-bólimi boiynsha qylmystyq is qozǵalǵan.
Sonymen birge Ishki ister ministri Erlan Turǵymbaev ishki ister organdarynyń brakonerliktiń aldyn alý jáne jolyn kesý boiynsha atqaryp jatqan jumystary týraly habarlady.
Jyl basynan beri kiikterdi brakonerlik jolmen aýlaý faktisi boiynsha 37 qylmystyq is qozǵaldy, 32 adam ustaldy, 634 kiik múiizi,qylmys quraldary, sondai-aq, 13 birli avtokólik jáne 19 - atys qarýy alyndy. Keltirilgen shyǵyn kólemi 1,3 milliard teńgeden asty.
«Brakonerlik úshin ákimshilik jáne qylmystyq jaýapkershilikti kúsheitý, onyń ishinde múlik pen qylmys quralyn tárkileý týraly usynystar engizildi. Tabiǵat jáne jan-janýarlar álemine qatysty zańdardy buzýshylar keltirgen ziian úshin óndiriletin ótemaqy mólsherin arttyrý másele de pysyqtalýda. Orman sharýashylyǵy jáne jan-janýarlar álemin qorǵaý bólimsheleriniń kólikterin arnaiy jaryq jáne dybys signaldarymen jabdyqtap, bilgili bir túske boiaý máselesi ázirlendi», delingen habarlamada.
