QR IIDM janynan Qazaqstannyń ónerkásipti damytý qory qurylady, dep habarlaidy "Ult aqparat" Úkimet basshysynyń baspasóz qyzmetine silteme jasap.
Qor bizneske mashina jasaý salasyndaǵy kapitaldy qajet etetin óndiristerdi damytýǵa múmkindik beredi. Bul týraly «Qazaqstan mashina jasaýshylar odaǵy» ZTB tóraǵasy Meiram Pishembaev QR Úkimetindegi baspasóz konferentsiiasy barysynda aitty.
Mashina jasaý el ekonomikasyn óndiris quraldarymen qamtamasyz etedi, barlyq basqa óńdeý óndiristeriniń, otyn-energetika, kólik jáne logistika, ekonomikanyń óńdeý sektory jáne aýyl sharýashylyǵy salalarynyń damýyna yqpal etedi.
Sala jasaqtaýshy jáne qosalqy bólshekterdi óndirýden daiyn ónim túrlerin shyǵarýǵa kóshti, atap aitsaq: teplovozdar, elektrovozdar, jolaýshylar jáne júk vagondary, júk jáne jeńil avtomobilder, avtobýstar, astyq jinaý kombaindary, sorǵy jabdyqtary, liftiler.
2000 jyldan bastap Qazaqstanda mashina jasaý óndirisiniń kólemi 24 esege artyp, 2018 jyldyń qorytyndysy boiynsha 1,1 trln teńgeni qurady.
M. Pishembaev atap ótkendei, Jol kartasyn qabyldaý — otandyq mashina jasaý salasy úshin mańyzdy oqiǵa, salany orta merzimdi perspektivada damytýdyń strategiialyq kórinisi. Qujat úsh kitke negizdelgen.
Birinshisi — elimizde teńdestirilgen ónerkásiptik saiasatty júrgizýge yqpal etetin «Ónerkásiptik saiasat týraly» Zańnyń qabyldanýy. Memlekettik qoldaý sharalary bir zańda ortalyqtandyrylatyn bolady.
Ekinshisi — Qazaqstan Respýblikasynyń Indýstriia jáne infraqurylymdyq damý ministrligi janynan Qazaqstannyń ónerkásipti damytý qoryn qurý.
Qor bizneske mashina jasaý salasyndaǵy kapitaldy kóp qajet etetin óndiristerdi damytýǵa jáne mashina jasaýdy qosa alǵanda, óńdeý sektoryndaǵy jobalardy qarjylandyrýǵa múmkindik beredi.
Osyǵan uqsas qorlar birneshe jyldar boiy Reseide, Belarýste jáne EYDU elderinde sátti jumys istep keledi, olar lizingtik jobalarǵa jyldyq 1,4% mólsherlemesimen jáne ǵylymi-tehnikalyq ázirlemeler, eńbek ónimdiligi men innovatsiialyq ónimderdi arttyrýǵa 1% mólsherlememen zaim beredi.
Úshinshisi — qoldanystaǵy qýattylyqtardy jańǵyrtý, sondai-aq otandyq kásiporyndardyń eksporttyq áleýetin odan ári arttyrý maqsatynda kásiporyndarǵa salyqtyq preferentsiialar engizý.
Mashina jasaýdy damytýdyń Jol kartasyna engizilgen sharalar 2024 jylǵa qarai óndiristiń jalpy kólemin keminde 2 trillion teńgege jetkizýge, bir jumysshyǵa eseptegende eńbek ónimdiligin qazirgi $12 myńnan $24 myńǵa deiin arttyrýǵa yntalandyrady.
«Jol kartasy ónerkásiptiń óńdeý sektorynyń kásiporyndarynyń básekege qabilettiligin arttyrý maqsatynda qabyldandy. Biz Qazaqstannyń indýstriialandyrý salasynyń damýyna laiyqty úles qosýǵa daiynbyz», — dedi Qazaqstan mashina jasaýshylar odaǵynyń tóraǵasy.
