Senat spikeri Dariǵa Nazarbaeva jaqynda aýyz sý baǵdarlamasynyń júzege asyrylýyn synǵa alǵan bolatyn. Bul synǵa qatysty qandai jumys atqarylatynyn QR Indýstriia jáne infraqurylymdyq damý ministrligi Qurylys jáne turǵyn-úi kommýnaldyq sharýashylyǵy isteri komitetiniń tóraǵasy Marhabat Jaiymbetov aityp berdi, dep habarlaidy QazAqparat tilshisi.
Marhabat Jaiymbetov bul jumystarǵa qatysty kemshilikter baryn jasyrǵan joq.
«Negizinen qomaqty qarajat bólindi, aýqymdy jumystar atqarylyp jatyr. Aldymen, «Aqbulaq» baǵdarlamasy, keiin «Aýyz sý» baǵdarlamasy qolǵa alynyp, endi aimaqtardy damytý baǵdarlamasy osy jumystardy jalǵastyrýda. 590 mlrd teńge bólindi, 940 aýyl ortalyqtandyrylǵan sý júiesine qosyldy. Bul aitarlyqtai kóp jumys ekenin aita ketý kerek. Álbette, kemshilikter joq emes, aiaqtalmai qalǵan nysandar bar. Biraq, ýaqyt óte kele bári sheshilýi tiis», - deidi Marhabat Jaiymbetov.
Onyń aitýynsha, 2019 jyldyń qorytyndysy boiynsha aýyldy jerlerde ortalyqtandyrylǵan sýmen jabdyqtaýǵa qoljetimdilikti aýyldar sany boiynsha 62 paiyzǵa deiin, al turǵyndar sany boiynsha 88 paiyzǵa deiin arttyrý josparlanyp otyr.
«Sondai-aq, memlekettik baǵdarlamada biýdjet qarajatyn utymdy paidalanýdy qamtamasyz etý maqsatynda sýmen jabdyqtaý jáne sý tartý jobalaryn josparlaý, irikteý jáne iske asyrý boiynsha júieli tásil kúsheitildi: qujattarǵa qoiylatyn talaptar tolyqtyryldy, barlyq óńirde (Jambyl oblysynan basqa) 2025 jylǵa deiingi aýyldy jerlerge qatysty keshendi josparlar ázirlendi. Negizgi talaptar men basymdyqtar naqtylandy», - deidi ol.
Eske sala ketsek, osydan eki kún buryn senatorlardyń ortalyq atqarýshy jáne jergilikti ókiletti organdary basshylarymen kezdesýi barysynda Senat spikeri Dariǵa Nazarbaeva aýyz sý baǵdarlamasynyń júzege asyrylýyn synǵa alǵan bolatyn.
«Óńirlerdi aýyz sý baǵdarlamasynyń etý úshin táýelsizdik alǵaly 540 mlrd teńgeden astam qarjy jumsaldy. Biraq, kóptegen eldi mekenderde halyq taza aýyz sýǵa qol jetkize almai keledi. Osy aýyz sý baǵdarlamasy «Bermýd úshtaǵany» siiaqty, qarjy jumbaq jolmen joǵalyp ketedi. Nelikten?», - degen edi Dariǵa Nazarbaeva.
