QR Energetika ministri Qanat Bozymbaev álemdik naryqta turaqtylyqty saqtaý úshin munaidyń qolaily baǵasyn atady, dep habarlaidy QazAqparat.
«Taqtatas munaiyn óndirý (AQSh-ta) aitarlyqtai artpas úshin barreline 50-den 60 dollarǵa deiingi dáliz durys bolady dep sanalýda. Eger de munai quny barreline 60 dollardan assa, onda AQSh-ta taqtatas munaiyn óndirý kólemi eleýli kólemde artýy yqtimal», - dedi Bozymbaev Úkimet otyrysynan keiin.
Energetika ministri taqtatas munaiyn óndirý kóleminiń artýy eksporttaýshylarǵa tiimsiz ekenin atap ótti.
«Bundaida munai eksporttaýshylar zardap shegedi, sonymen qatar bizde qordyń kólemi de ósedi. Sondyqtan naryqtyń turaqtylyǵy turǵysynda barreline 50 jáne 60 dollar aralyǵyndaǵy dáliz eń qolaily baǵa»,-dep túiindedi sózin ministr.
