QR Densaýlyq saqtaý ministrliginiń resmi ókili Dias Ahmetshárip Nur-Sultan qalasynda koronavirýs juqtyrdy dep kúdiktelgen áielge qatysty mán-jaidy aitty, dep habarlaidy "Ult aqparat".
«Nur-Sultan qalasynda koronavirýsqa kúdik keltirilgen áiel kópsalaly meditsinalyq ortalyqtyń qabyldaý bólimshesine jetkizildi. Ony infektsionist dáriger qarady. Sondai-aq, zerthanalyq-diagnostikalyq zertteýler júrgizildi. Saraptama nátijesinde koronavirýs jáne jedel respiratorly virýstyq infektsiia diagnozy rastalǵan joq. Áieldi aýrýhanaǵa jatqyzýdyń qajeti bolmady. Naýqas tirkelgen jeri boiynsha emhanaǵa dinamikalyq baqylaýǵa jiberildi», - dedi Dias Ahmetshárip.
Sonymen birge onyń aitýynsha, Nur-Sultan qalasynyń emhanalary karantinge jabylǵan joq.
«Qytaidan kelgenderge jáne olarmen bailanysta bolǵan adamdarǵa qońyraý soǵý arqyly jáne úilerdi aralaý arqyly kún saiyn baqylaý júrgizilýde», - deidi ol.
Resmi ókil buǵan deiin qansha adam karantinde qalyp otyrǵanyn málim etken bolatyn.
