Meditsina qyzmetkerleriniń koronavirýs juqtyrý jaǵdailary respýblikanyń 13 oblysy men Nur-Sultan, Almaty qalalarynda tirkelgen.
Bul týraly QR DSM Taýarlar men kórsetiletin qyzmetterdiń sapasy men qaýipsizdigin baqylaý komitetiniń tóraǵasy Liýdmila Biýrabekova málim etti, dep habarlaidy QazAqparat.
«Qazirgi ýaqytta koronavirýs juqtyrǵan 21 adam aýyr jaǵdaida jatyr. Virýsty juqtyrý jaǵdaiynyń kúndik ósimi shamamen 9,9 paiyzdy quraidy. Ótken táýlikte búkil respýblikada 86 jaǵdai tirkeldi. Atap aitqanda Nur-Sultanda - 20, Almatyda 28 adam koronavirýsty juqtyrdy. Kúndizgi jáne statsionarlyq karantinde jatqan adamdardyń sany – 34 236. Onyń ishinde patsientterdiń 68 paiyzy úi karantininde», - dedi Liýdmila Biýrabekova OKQ-da onlain rejimde ótken baspasóz máslihatynda.
Komitet tóraǵasy sonymen qatar meditsina qyzmetkerleriniń koronavirýsty juqtyrý faktilerine keńirek toqtaldy.
«Qazirgi tańda 211 meditsina qyzmetkeri koronavirýs juqtyryp alǵan. Iaǵni jalpy naýqastardyń 20,5 paiyzy – meditsina salasynyń qyzmetkerleri. Bári de meditsinalyq uiymdarda tirkelgen. 13 oblysta osyndai oqiǵalar oryn alsa, eń kóp jaǵdaidy Nur-Sultan jáne Almaty qalalarynda, SQO jáne Atyraý oblystarynan baiqaýǵa bolady. Virýs juqtyrǵan 211 adamnyń 74 jaǵdaiy – profildi statsionarlarda eńbek etetinder. Onyń ishinde Nur-Sultan qalasyndaǵy karantindik ortalyqta 20 adam, provizorlyq statsionarda - 10 (Qaraǵandy, SQO, BQO, Túrkistan), infektsiialyq aýrýhanalarda 44 meditsinalyq qyzmetker (Almaty, Nur-Sultan qalalary Atyraý, Jambyl, Qaraǵandy, Qyzylorda) koronavirýsty juqtyrǵan», - dedi ol.
