QR Bilim jáne ǵylym ministrliginiń Bilim jáne ǵylym salasyndaǵy sapany qamtamasyz etý komiteti M.Tynyshpaev atyndaǵy Qazaq kólik jáne kommýnikatsiia akademiiasyn (Almaty q.) bas litsenziiasynan aiyrý týraly sheshim qabyldady, dep habarlaidy "Ult aqparat" ministrliktiń resmi saityna silteme jasap.
Sheshim 10 jumys kúni ótkennen keiin zańdy kúshine enedi, keiin joǵary oqý orny bilim berý salasyndaǵy qyzmetin toqtatýǵa mindetti bolady.
«Jyl boiy Akademiiada josparly jáne jospardan tys tekserýler júrgizilip, bilim berý salasyndaǵy óreskel zańbuzýshylyqtar anyqtaldy. Atap aitqanda, oqý protsesi professorlyq-oqytýshylyq qurammen, óndiristik praktika bazalarymen, oqý, oqý-ádistemelik jáne ǵylymi ádebiettermen qamtamasyz etilmegen. Bilim berý baǵdarlamalary jumys berýshilerdiń suranysyna tolyq sáikes kelmedi. Bul túlekterdiń jumysqa ornalasýyna da áser etti. «Atameken» QR UKP júrgizgen reiting boiynsha Akademiianyń bilim berý baǵdarlamalarynyń shamamen 60% jumys berýshilerdiń talaptaryna sáikes kelmeidi»,-delingen habarlamada.
Sonymen qatar onda buǵan deiin Bilim jáne ǵylym ministrligine osy ýniversitette «oqyǵan» sheteldik stýdentter de júgingendigi aitylǵan. Olar oqýdyń aqysyn tólegen, biraq is júzinde Akademiiada «oqymaǵan» bolyp shyqty. Materialdar tiisti quqyq qorǵaý organdaryna jiberildi.
«Biz Akademiia ieleri qarsylyq tanytýy múmkin ekenin túsinemiz. Olar Komitettiń sheshimine sot tártibi boiynsha shaǵymdanýǵa quqyly. Biz Memleket basshysynyń sapaly bilim berýdi qamtamasyz etpeitin joǵary oqý oryndaryn jabý boiynsha qoiǵan mindetterin iske asyrýǵa tiispiz. Birinshi kezekte, stýdentterdiń sapaly qyzmet alý quqyqtary men múddelerin eskerip jatyrmyz. Olarǵa alańdaýǵa esh sebepteri joq.
Bilim alýshylar sol qaladaǵy basqa joǵary oqý oryndaryna grantyn saqtai otyryp, aýysa alady, sondai-aq aqyly negizde oqyǵandar úshin de oqý quny artpaidy. Aýysý úshin olarǵa semestrdiń aiaqtalýyn kútýdiń qajeti joq, biz qazirden bastap basqa JOO aýysýǵa ruqsat berdik. Sonymen qatar stýdentterdiń oqý nátijeleri de saqtalady jáne aýysyp barǵan joǵary oqý ornynda eskeriledi.
Buǵan deiin 35 myń stýdenti bar joǵary oqý orny jabylǵanda, barlyq stýdentterdi basqa oqý ornyndaryna aýystyrý boiynsha jumys atqarǵan bolatynbyz, iaǵni mundai tájiribe bar. Professorlyq-oqytýshylyq quramdy jumysqa ornalastyrý boiynsha da jumys júrgiziletin bolady», – dep atap ótti QR BǴM Bilim jáne ǵylym salasyndaǵy sapany qamtamasyz etý komitetiniń tóraiymy Gúlzat Kóbenova.
Qazirgi ýaqytta M. Tynyshpaev atyndaǵy Qazaq kólik jáne kommýnikatsiia akademiiasynda 5 myńnan astam adam oqidy. Akademiiada oqý quny – bilim berý baǵdarlamasyna bailanysty 427 myń teńgeden bastap 1,5 mln teńgege deiin.
«Qazaq kólik jáne kommýnikatsiia akademiiasyna qatysty túsken shaǵymdar bir jyldyń kóleminde tolastaǵan emes. Akademiianyń 30-shy jyldardan bastaý alǵan tarihyna qaramastan, ýniversitet basshylyǵy oqý ornyn osy jaǵdaiǵa jetkizdi. Kezinde dál osy joǵary oqý orny temirjol salasyn sapaly kadrlarmen qamtamasyz etken bolatyn. Ókinishtisi sol, qazirgi tańda bul bilim ordasynda bolashaq mamandardy tiisti deńgeide daiarlaý boiynsha túitkildi máseleler jeterlik. Mundai jaǵdai eldiń ekonomikasy úshin strategiialyq mańyzdy salasyna maman daiyndaý barysynda oryn almaýy tiis. Bilim berý baǵyttary uqsas oqý oryndarynyń kúsh-jigerin biriktirý qajet shyǵar», – dei kele, QR joǵary oqý oryndary qaýymdastyǵynyń prezidenti Rahman Alshanov sala mamandaryn daiarlaýdy saqtap qalýdyń mańyzdylyǵyn atap ótip.
Akademiiadaǵy bakalavriattyń 8 baǵyty, magistratýranyń 6 baǵyty, doktorantýranyń 4 baǵyty boiynsha litsenziialar Almaty qalasynyń basqa 30 joǵary oqý ornynda bar.
«Materialdyq-tehnikalyq infraqurylymnyń jáne bilim berý protsesin júzege asyrýǵa salynǵan investitsiialardyń bolýyn eskere otyryp, Qazaq kólik jáne kommýnikatsiia akademiiasy bazasynda mektep nemese kolledj qurý týraly usynysty qarastyrýǵa bolady. Sondai-aq olar qaladaǵy basqa da uqsas beiindegi joǵary oqý oryndarymen birige alady», – dedi QR BǴM Bilim jáne ǵylym salasyndaǵy sapany qamtamasyz etý komitetiniń tóraiymy Gúlzat Kóbenova.
