QR Premer-Ministri A. Maminniń tóraǵalyǵymen ótken Úkimettiń zań jobalaý jumystarynyń 2020 jylǵa arnalǵan josparynyń jobasy týraly Úkimet otyrysynda ádilet vitse-ministri N. Pan baiandama jasady, dep habarlaidy "Ult aqparat".
Ádilet ministrligi Zań jobalaý qyzmeti máseleleri jónindegi vedomstvoaralyq komissiia múshelerimen birlesip, Úkimettiń zań jobalaý jumystarynyń 2020 jylǵa arnalǵan jospar jobasyn ázirledi.
Jospar jobasy Prezident pen memlekettiń strategiialyq qujattarynda aiqyndalǵan mindetter negizinde ázirlengen jáne 16 zań jobasyn ázirleýdi kózdeidi. Olar áleýmettik qamsyzdandyrý, dene shynyqtyrý jáne sport, arnaiy memlekettik organdar qyzmetkerleri men áskeri qyzmetshilerdiń turǵyn úi qatynastary, erekshe taýarlardy baqylaý, kórneki aqparat jáne basqada salalardy odan ári damytýǵa baǵyttalǵan.
Aldaǵy jyly 2 jańa zań jobasyn ázirleý kózdelip otyr. Bul - «Erekshe taýarlardy baqylaý týraly» jáne «Ósimdik álemi týraly» zań jobalary.
- «Erekshe taýarlardy baqylaý týraly» Zań jobasyn jańa redaktsiiada ázirleý ulttyq eksporttyq baqylaý júiesin jetildirý, sondai-aq ulttyq jáne óńirlik qaýipsizdikti qamtamasyz etýge baǵyttalǵan.
- «Ósimdik álemi týraly» jańa zań jobasyn ázirleý ósimdikter dúniesi obektilerin qorǵaý jáne paidalaný salasyndaǵy qatynastardy retteýdi qamtamasyz etý, olardy tiimdi basqarý úshin jaǵdai jasaý maqsatynda qajet.
Budan basqa aldaǵy jyly Memleket basshysynyń 2019 jylǵy 2 qyrkúiektegi Qazaqstan halqyna Joldaýyn iske asyrý jónindegi Jalpyulttyq is-sharalar josparynan týyndaityn 2 zań jobasy Parlamentke engiziletin bolady.
Bul - halyqtyń barlyq jas toptary arasynda dene shynyqtyrý men buqaralyq sportty damytýǵa, balalar úshin sporttyq infraqurylymnyń barynsha qol jetimdiligin qamtamasyz etýge baǵyttalǵan zań jobasy. Jáne, jergilikti mańyzy bar áleýmettik-ekonomikalyq mindetterdi sheshýde biliktiń aýdandyq, qalalyq jáne aýyldyq deńgeileriniń derbestigi men jaýapkershiligin keńeitýdi kózdeitin zań jobasy ázirlenetin bolady.
Jospar jobasynda kózdelgen 16 zań jobasynyń ishinen Parlamentke 2020 jyldyń birinshi jartyjyldyǵynda - 4, al ekinshi jartyjyldyǵynda - 12 zań jobasyn engizý josparlanýda.
Zań jobalaý jumystarynyń josparyn jasaý kezinde zań jobalaryn engizý merzimderi ázirleýshi memlekettik organdarmen usynyldy.
Indýstriia jáne infraqurylymdyq damý ministrligi 3 zań jobasyn ázirleidi. Qorǵanys, Ulttyq ekonomika, Syrtqy ister, Mádeniet jáne sport, Ekologiia, geologiia jáne tabiǵi resýrstar, Eńbek jáne halyqty áleýmettik qorǵaý ministrlikteri 2 zań jobasynan ázirleitin bolady. Qarjy ministrligi bir zań jobasyn ázirleitin bolady.
