Fýtboldan Premer-liga komandalary arasyndaǵy el birinshiliginiń on ekinshi týry máresine jetti, dep habarlaidy "Ult aqparat".
Sońǵy eki kezdesýdiń birinde Qostanaida «Tobyl» Petropavldyń «Qyzyljaryn» qabyldady. Alań ieleri qarsylastar qaqpasyna jii shabýyldady. Osyndai sátterdiń birinde qostanailyq Nemania Nikolich 63-minýtta mergendik tanytsa, 77-minýtta Serikjan Mýjikov penaltiden múlt ketken joq. Osylaisha «Tobyl» qarsylasynan 2:0 esebimen basym tústi.
Al «Atyraý» óz alańynda Shymkenttiń «Ordabasy» klýbyn qabyldady. Atalǵan kezdesýde komandalar bir-biriniń qaqpasynan sańylaý taba alǵan joq. Nátijesinde komandalar 0:0 esebine qanaǵat bildirdi.
Búgin, 19 mamyrda Aqtaýdyń «Kaspii» komandasy óz alańynda Qaraǵandynyń «Shahterin» 3:0 esebimen súrindirse, «Taraz» óz alańynda kósh sońynda kele jatqan Taldyqorǵannyń «Jetisýyna» 2:3 esebimen jol berdi.
Al keshe, 18 mamyrda Oraldyń «Aqjaiyǵy» Túrkistanda «Turandy» 2:0, elordalyq «Astana» Qyzylordada «Qaisardy» 5:2 esebimen jeńdi. Al Almatyda «Qairat» «Aqtóbeni» 4:2 esebimen tize búktirdi.
Atalǵan týrdan keiin 32 upaimen «Astana» kósh bastap tur. Odan keiingi oryndardaǵy «Tobyldyń» 25, «Aqjaiyqtyń» 21 upaiy bar.
Endi aldaǵy on úshinshi týr oiyndary 23 jáne 24 mamyr kúnderi ótkiziledi.
