Búgin fýtboldan Premer-liga komandalary arasyndaǵy el birinshiliginiń on segizinshi týrynyń alǵashqy oiyn kúni aiaqtaldy, dep habarlaidy "Ult aqparat".
Búgingi úshinshi oiynda Shymkentte «Ordabasy» óz alańynda Taldyqorǵannyń «Jetisýyn» qabyldady. Atalǵan kezdesýde alań ieleri jeńiske jetý jolyn izdedi.
Nátijesinde 13-minýtta shymkenttik klýbtan Sergei Hijnichenko esep ashty. Kelesi kezekte Mirzad Mehanovich 44, 68-minýttarda mergendik tanytyp, qos goldyń avtory atandy. Osylaisha «Ordabasy» qarsylasynan 3:0 esebimen basym tústi. Sol arqyly shymkenttik klýb týrnir kestesinde tórtinshi orynǵa kóterildi.
Aita keteiik, búgin atalǵan týrda taǵy eki kezdesý ótkizildi. Petropavlda «Qyzyljar» men elordalyq «Astanany» 3:2, Qaraǵandynyń «Shahteri» óz alańynda «Aqtóbeni» 1:0 esebimen tize búktirdi.
Qalǵan tórt oiyn erteń, 28 maýsymda bolady. Bul kúni «Aqjaiyq» pen «Taraz», «Tobyl» men «Qairat», «Kaspii» men «Turan», «Atyraý» men «Qaisar» jasyl alańǵa shyǵady.
