بٷگٸن فۋتبولدان پرەمەر-ليگا كوماندالارى اراسىنداعى ەل بٸرٸنشٸلٸگٸنٸڭ ون سەگٸزٸنشٸ تۋرىنىڭ العاشقى ويىن كٷنٸ اياقتالدى, دەپ حابارلايدى "ۇلت اقپارات".
بٷگٸنگٸ ٷشٸنشٸ ويىندا شىمكەنتتە «ورداباسى» ٶز الاڭىندا تالدىقورعاننىڭ «جەتٸسۋىن» قابىلدادى. اتالعان كەزدەسۋدە الاڭ يەلەرٸ جەڭٸسكە جەتۋ جولىن ٸزدەدٸ.
نەتيجەسٸندە 13-مينۋتتا شىمكەنتتٸك كلۋبتان سەرگەي حيجنيچەنكو ەسەپ اشتى. كەلەسٸ كەزەكتە ميرزاد مەحانوۆيچ 44, 68-مينۋتتاردا مەرگەندٸك تانىتىپ, قوس گولدىڭ اۆتورى اتاندى. وسىلايشا «ورداباسى» قارسىلاسىنان 3:0 ەسەبٸمەن باسىم تٷستٸ. سول ارقىلى شىمكەنتتٸك كلۋب تۋرنير كەستەسٸندە تٶرتٸنشٸ ورىنعا كٶتەرٸلدٸ.
ايتا كەتەيٸك, بٷگٸن اتالعان تۋردا تاعى ەكٸ كەزدەسۋ ٶتكٸزٸلدٸ. پەتروپاۆلدا «قىزىلجار» مەن ەلوردالىق «استانانى» 3:2, قاراعاندىنىڭ «شاحتەرٸ» ٶز الاڭىندا «اقتٶبەنٸ» 1:0 ەسەبٸمەن تٸزە بٷكتٸردٸ.
قالعان تٶرت ويىن ەرتەڭ, 28 ماۋسىمدا بولادى. بۇل كٷنٸ «اقجايىق» پەن «تاراز», «توبىل» مەن «قايرات», «كاسپيي» مەن «تۇران», «اتىراۋ» مەن «قايسار» جاسىل الاڭعا شىعادى.
