Búgin fýtboldan Premer-liga komandalary arasyndaǵy Qazaqstan chempionatynyń toǵyzynshy týry máresine jetti, dep habarlaidy "Ult aqparat".
Atalǵan týrdaǵy sońǵy oiyn Petropavldyń «Qyzyljar» jáne Almatynyń «Qairat» komandalary arasynda ótti. Kezdesý taǵdyryn sheshken gol 27-minýtta soǵyldy. Ony «Qairat» shabýylshysy Abat Aiymbetov óziniń enshisine jazdy.
Shabýylshy biylǵy dop dodasyndaǵy besinshi golyn soqty. Kezdesýde «Qairat» qarsylasynan 1:0 esebimen basym tústi.
Osylaisha almatylyq klýb altynshy oiyn qatarynan jeńiske jetip otyr. Qazir olardyń enshisinde 24 upai bar. Ekinshi oryndaǵy «Astanadan» bes upaiǵa uzap ketti.
Bul týrdaǵy ózge oiyndarda «Oqjetpes» pen «Kaspii» 2:2, «Ordabasy» men «Qaisar», «Astana» men «Shahter» 1:1 esebimen teń tússe, «Jetisý» «Tarazdy» 2:0 esebimen tize búktirdi.
Endi onynshy týr oiyndary 22, 23, 24 qyrkúiek kúnderi ótkiziledi.
«Tobyl» men «Oqjetpes» 22 qyrkúiekte ótkizilse, 23 qyrkúiekte «Kaspii» men «Taraz», 24 qyrkúiekte «Jetisý» men «Shahter», «Ordabasy» men «Qyzyljar», «Qaisar» men «Astana» komandalary kezdesedi.
