Búgin fýtboldan Premer-liga komandalary arasyndaǵy el birinshiliginiń 19-týrynda eki oiyn ótkizildi, dep habarlaidy "Ult aqparat".
Atalǵan týrdyń shymyldyǵy elordalyq «Astana» men Qaraǵandynyń «Shahter», Almatynyń «Qairat» jáne «Atyraý» komandalary kezdesýlerimen túrildi. Qatar ótken eki oiyn da goldardyń kóp soǵylýymen erekshelendi.
«Astana» men «Shahter» kezdesýi tartysqa toly boldy. Eki komanda barlyǵy jeti gol soǵyp ketti. Aldymen elordalyq klýbtan Maks Ebong - 6, Valerii Chýperka 26-minýttarda mergendigimen kózge tústi. Budan keiin qaraǵandylyq komandadan Ivan Sviridov 41-minýtta esep aiyrmasyn qysqartty. Elordalyq Abat Aiymbetov 55-minýtta gol soqsa, qaraǵandylyq Gevorg Nadjarian 63-minýtta kózge tústi. «Astana» sapynan Tigran Barsegian 77-minýtta qaqpany dál kózdese, oǵan qaraǵandylyq Eskendir Qybyrai 78-minýtta bir golmen jaýap qaiyrdy.
Osylaisha «Astana» qarsylasyn 4:3 esebimen tize búktirip, týrnir kestesinde 41 upaimen qaitadan kósh basyna shyqty.
Al almatylyq «Qairat» óz alańynda «Atyraýdy» 5:0 esebimen tize búktirdi. Oiyn barysynda almatylyq Artýr Shýshenachev 29, 60-minýttarda qos goldyń avtory atandy. Al Hose Konte 57, Gýljigit Alyqulov 69, Kamo Oganesian 93-minýttarda esep aiyrmasyn ulǵaitty.
Eske salsaq, búgin atalǵan týrda taǵy bir kezdesý ótkizilýde. «Aqtóbe» óz alańynda «Aqjaiyq» (Oral) komandasyn qabyldaýda.
Endi 3 shildede saǵat 18.00-de «Jetisý» (Taldyqorǵan) men «Qyzyljar» (Petropavl), 21.00-de «Qaisar» (Qyzylorda) men «Ordabasy» (Shymkent), 20.00-de «Turan» (Túrkistan) men «Tobyl» (Qostanai) oiyndary ótkiziledi.
