Búgin fýtboldan Premer-liga komandalary arasyndaǵy Qazaqstan birinshiliginde elordalyq «Astana» besinshi jyl qatarynan chempion atandy, dep habarlaidy "Ult aqparat".
Bul týrdaǵy basty kezdesý Qostanai qalasynda ótkizildi. Jergilikti «Tobyl» elordalyq «Astanany» qabyldady.
Eki komanda úshin de búgingi oiynnyń mańyzy zor edi. «Astana» chempiondyqqa úmitker bolsa, «Tobyl» úshinshi oryn úshin báseke kórigin qyzdyryp keledi. Degenmen atalmysh oiynda elordalyq klýbtyń joly boldy. Olardyń qatarynan 37-minýtta Iýrii Logvinenko qaqpany dál kózdedi. «Astana» osylaisha qostanailyq klýbty 1:0 esebimen jeńip, bir týr buryn chempiondyq ataqqa qol jetkizdi.
Chempiondyqqa úmitker komandanyń biri - Almatynyń «Qairaty» bul joly syrt alańda Pavlodardyń «Ertis» komandasymen kezdesti. Oiyn barysynda alań ieleri táp-táýir oiyn kórsetti. Nátijesinde 38-minýtta Sultan Saǵynaev, 62-minýtta Jeremi Manzorro mergendik tanytty. Odan keiin pavlodarlyq klýb sapynan Milosh Stamenkovich, Arman Keńesov, Karlos Fonsekalar taǵy da úsh gol soqty. Nátijesinde «Qairat» qarsylasynan 0:5 esebimen jeńilip, biylǵy dop dodasynda kúmis medaldi qanaǵat tutty.
Qazirgi ýaqytta úshinshi oryn úshin saiysqa túsip júrgen Shymkenttiń «Ordabasy» klýby syrt alańda «Atyraý» komandasymen synǵa túsken edi. Bul kezdesýde atyraýlyq Petr Gjelchak 12-minýtta shymkenttik klýb qaqpasyn dál kózdese, oǵan shymkenttik shabýylshy Joao Poalo 42-minýtta bir golmen jaýap qaiyrdy. Odan keiin shymkenttik shabýylshy Aleksei Shetkin 87, Ziki Badibanga 90-minýtta gol soǵyp ketti. Osylaisha «Ordabasy» qarsylasynan 3:1 esebimen basym tústi. Aita keterligi, «Atyraý» komandasy týrnir kestesindegi jaǵdaiyn jaqsartýǵa kúsh salyp keledi. Olar qazir 11-orynda tur. Bul oryndaǵy komanda chempionat bitkende birinshi ligaǵa túsip qalady. Sondyqtan atyraýlyq klýb 10-oryn úshin «Taraz» komandasymen tartysqa túsip júr.
«Taraz» komandasy búgin óz alańynda Qyzylordanyń «Qaisar» komandasymen kezdesti. Alań ieleri kezdesý barysynda jaqsy oiyn órnegin kórsetti. Olardyń qatarynan 12-minýtta Álisher Súlei esep ashsa, qyzylordalyq komanda qatarynan 30-minýtta Andre Býkia tarazy basyn teńestirdi. Al 46-minýtta «Taraz» 46-minýtta Bekzat Shadmanov qaitadan óz komandasyn alǵa shyǵardy. Oiynda tarazdyq klýb 2:1 esebimen jeńiske jetti.
Sondai-aq, búgin «Aqtóbe» óz alańynda Qaraǵandynyń «Shahterin» qabyldady. Bul oiynda aqtóbelik klýb sapynan Aleksandr Kitsak 29, Abat Aiymbetov 32, 62-minýttarda gol soqsa, «Shahterden» Ivan Peshich 46, Artýr Rejinaldo 58-minýtta eki golmen jaýap qaiyrdy. «Aqtóbe» qarsylasynan 3:2 esebimen tize búktirdi.
Bul týrdaǵy Kókshetaýdyń «Oqjetpesi» men «Jetisý» komandalary arasyndaǵy kezdesýde 1:1 esebimen tirkeldi. Goldardy kókshetaýlyq klýb sapyna 78-minýtta Sanat Jumahanov, taldyqorǵandyqtar qatarynan Martin Toshev 75-minýtta óziniń enshisine jazdy.
Endi sońǵy týr oiyndary 10 qarasha kúni ótkiziledi. Bul kúni «Astana» men «Ertis», «Jetisý» men «Shahter», «Qairat» pen «Atyraý», «Qaisar» men «Oqjetpes», «Ordabasy» men «Taraz», «Tobyl» men «Aqtóbe» komandalary kezdesedi.
