Memlekettik qyzmet isteri jáne sybailas jemqorlyqqa qarsy is-qimyl agenttiginiń tóraǵasy Qairat Qojamjarov qazaqstandyq akter Tuńǵyshbai Jamanqulovtyń ustalýyna qatysty pikir bildirdi, - dep habarlaidy "Ult aqparat" kaz.tengrinews.kz portalyna silteme jasap.
"Keide qoǵam bastapqyda ne bolyp jatqanyn túsinbei jatady. Sebebi, elimizde qylmystyq qýdalaýǵa kóbinese tanymal adamdar tartylyp jatady. Olar túrli salalarda - shyǵarmashylyqta da jumys isteý múmkin. Mysaly, Jamanqulov. Halyq ártisi, elimizdiń súiikti azamaty aiyptalýshy bolady dep kim oilaǵan. Biz dálelderdi kórsetýimiz kerek", - dedi Qojamjarov alqa otyrysynda.
Sondai-aq, Qojamjarov CentralAsiaMonitor bas redaktory, Radiotochka.kz saitynyń direktory Bigeldi Ǵabdýllinge qatysty pikir bildirdi.
"Ǵabdýllinge qatysty qylmystyq istiń bastalyp jatqan sáti esimde. Sonda jýrnalister menen dálelderdi kórsetýimdi suraǵan bolatyn. Sot ashyq túrde ótti, ol kinásin moiyndady. Barlyq dálelder men tergeý jumystarynyń nátijeleri qoǵam aldynda kórsetildi. Sondai-aq, onyń "maǵan belgili bir somada tapsyrys bermeseńizder, qiyndyqtar bolady" dep aitqany týraly dálelder bar. Bigeldi Ǵabdýllin rasynda da osyǵan uqsas maqalalardy jazyp júrgen", - dedi Qojamjarov.
Eske sala keteiik, 2016 jyldyń 2 qarashasynda qazaqstandyq akter Tuńǵyshbai Jamanqulov ustalǵan bolatyn. Tergeýdiń málimetinshe, "Qazaqfilm" AQ-nyń "T.K.TURAN UNIVERSAL BUSINESS" JShS-ǵa filmniń óndirisine 79 million teńge bólgeni anyqtalǵan. "Onyń 69 million teńgesin kartina prodiýseri Tuńǵyshbai Jamanqulov jymqyrǵan. Ol - "T.K.TURAN UNIVERSAL BUSINESS" JShS-nyń quryltaishysy", - delingen edi habarlamada.
