Sýret: freepik
Senatta "Serpin-2050" baǵdarlamasy aiasynda sotqa tartylǵan myńdaǵan adamnyń problemasy kóterildi. Osy salada kózboýiashylyq ta joq emes, - dep habarlaidy Sputnik Qazaqstan.
Senator Alisher Satvaldievtiń aitýynsha, búginde baǵdarlamany iske asyrý kezinde jiberilgen kemshilikterdiń saldarynan jyl saiyn soltústikte qalatyn jastardyń sany azaiyp keledi. Al "Serpin-2050" resmi saitynyń jumysy toqtap qaldy.
Resmi málimetke sáikes, 2020-2022 jyldary aralyǵynda baǵdarlamamen oqýdy támamdaǵan 8 948 bitirýshiniń ishinde 3 200 adam eki jyl eńbek ótilin óteý mindetin oryndamaǵan. Ministrlik olardyń bárin sotqa berip, jumsalǵan aqshany qaitarýdy talap etip otyr.
"Baǵdarlama aiasynda qolyna diplomyn alǵan árbir úshinshi túlektiń osylaisha sotqa tartylýynyń basty sebebi – jumys tappai, baspana máselesin sheshe almai, tyǵyryqqa tirelýi. Kóp jaǵdaida joldama berilgen mekemelerde shyn máninde ol jumys oryndary joq bolyp shyǵady. Al basqa mekemeler jumys ótilinsiz qabyldamaidy. Qabyldasa da, 80-90 myńnan joǵary jalaqy tólemeidi. Jataqhanadan shyǵarylǵan 100-120 myń teńgege baspana jaldaýǵa májbúr bolǵan jastarǵa óz aýyldaryna qaitýdan ózge amal qalmaidy", - dedi Satvaldiev Cenattyń búgingi otyrysynda.
Budan bólek, eńbek ótilin óteý mindetinen bosatylǵandar da az emes. Olardyń jalpy sany – 4 200 adam. Ondai múmkindik balaly bolǵan, turmysqa shyqqan nemese magistratýraǵa túsken adamǵa beriledi. Osylaisha, baǵdarlamaǵa qatysýshylardyń 15 paiyzy ǵana jumysqa ornalasyp, barǵan óńirde qalyp otyr.
"Alaida bul jerde de kózboiaýshylyqtar bar. Baǵdarlamaǵa qatysýshylardyń aitýy boiynsha ýákiletti tulǵalar olarǵa jeke kásipker retinde tirkelip, ia bolmasa, ózge de zańdy tulǵalarmen kelisip, zeinetaqy qoryna ai saiyn tólem jasaý arqyly mindettemeni jabýdyń janama jolyn kórsetken. Kóp jastar osy tásildi paidalanyp, shyn máninde meiramhanalarda daiashy, saýda oryndarynda satýshy, taksi júrgizýshisi, kúzetshi, júk tasýshy jáne sol siiaqty jumystarmen ainalysyp júr. Al joǵary oqý oryndarynyń aqparatynda túlekterdiń 90-95 paiyzy jumyspen qamtylǵany aitylady", - dep atap kórsetti senator.
Ýniversitetter diplomdy da bere salmaidy. Aldymen jumysqa ornalasqany týraly hatty talap etedi.
Senatorlar Úkimetke depýtattyq saýal joldap, baǵdarlamanyń olqylyqtaryn joiýdy talap etti. Túlekterge baspana jaǵynan kómektesýdi de surady.
