Aqmola oblysynyń ákimi Sergei Kýlagin oblystyq máslihat depýtattary aldynda esep berýi kezinde Astananyń irgesindegi Qoiandy aýylyndaǵy ruqsatsyz salynǵan jekemenshik úilerdi zańdastyrý máselesi sheshilgenin málimdedi, dep habarlaidy BNews.kz tilshisi.
«Búginde jer qatynastary salasynda Jer zańnamasy normalarynyń saqtalýy – mańyzdy máselelerdiń biri bolyp otyr. 2007 jyldan qarapaiym jurtqa ońdy-soldy úlestirilgen jer daýyna qatysty túitkildi másele sheshildi. Búginde 17 jer telimi boiynsha menshik ieleri men iemdenip alýshy sýbektiler arasynda satyp alý-satý sharttary túzildi», – deidi óńir basshysy.
Onyń aitýynsha, qazirgi ýaqytta Tselinograd aýdanynyń Qosshy, Qaraótkel, Taitóbe, Qarajar eldi mekenderindegi zańbuzýshylyqtardy joiý jumystary júrgizilip jatyr.
«246 problemaly jer ýchaskelerine qatysty zań aiasynda sheshim qabyldandy. Qosshy, Qaraótkel aýyldaryndaǵy 120 jer telimine jer zańnamasyna sáikes tekserý júrgizildi, onyń 10 jer telimi memleket menshigine qaitaryldy. Qosshy, Taitóbe aýyldaryndaǵy 17 jer telimine qatysty qylmystyq is qozǵaldy. Qarajar selosyndaǵy 109 jer telimine qatysty zańnamaǵa sáikes shara qoldanylady», – deidi S.Kýlagin.
Oblys ákimi jerdi zańsyz basyp alý túitkili bir kúnniń máselesi emes ekenin alǵa tartty.
«Sońǵy eki jarym jyl ishinde Astana qalasynyń mańyndaǵy aimaqta, naqtyraq aitsaq, Qoiandy aýylynda jer telimin zańsyz iemdenip alýdyń jańa deregi tirkelgen joq. Jergilikti atqarý organdary quqyq qorǵaý qurylymdarymen birlesip eldi mekenderge turaqty monitoring jáne osyǵan uqsas derekterdi boldyrmaý maqsatynda túsinik jumystary júrgizildi. Politsiia, selo ákimderi júieli jumys istep jatyr. Árbir selo ákimi men ýchaskelik inspektor kimniń qandai qurylys júrgizip jatqandyǵynan habardar. Birlesken jumystyń nátijesinde zańsyzdyqqa tosqaýyl qoiylyp otyr. Bul máselege atústi qaraýǵa bolmaidy», – deidi ákim.
2014 jyldan beri Qoiandy aýylynda memleketke tiesili jerlerdi ózdiginen iemdenip alý jaǵdailaryn sheshýge qatysty júieli jumystar júrgizilgen. Búgingi kúni jeke turǵyn úi qurylysyna arnalǵan maqsatty jer telimderi saralanyp, shekara telimderi qaita bólindi, jer telimderi ieleriniń azamattyq-quqyqtyq mámilege kelýi úshin múmkindik berý maqsatynda jerge memlekettik aktiler daiyndaldy.
