Balalar taqyrybyna qalam terbep júrgen jastardyń biri – Meiirjan Jylqybai. Ol «Taýǵa saiahat», «Batyr qoian» kitaptary arqyly tanylǵan. Búgin «Ult» portaly jas jazýshynyń týyndylarymen tanystyrmaq.
«Taýǵa saiahat» áńgimeler toptamasy jas jazýshy Meiirjan Jylqybaidyń alǵashqy týyndysy. Týyndyda bir aýlada turatyn janýarlardyń taýǵa saiahattaǵan kezinde bastan keshken qyzyq oqiǵalary baiandalǵan.
Bul týraly jazýshy-drammatýrg Dýlat Isabekov bylai deidi:
«Áńgimeleriniń bári shaǵyn, jinaqy, tili shuraily eken. Áteshti jazsyn, kúshikti jazsyn, bárinen de erekshe sezimtaldyq, erekshe baiqaǵyshtyq bar. Úi janýarlarynyń tabiǵaty, minezi, bolmysy qysqa-qysqa siýjet arqyly dál sýrettelgen. Balalarǵa arnap qalam tartyp júrgen qazaq jazýshylarynyń arasynda dál osyndai stilde jazylǵan áńgimeler joqtyń qasy».
Úlken aǵasynan osyndai joǵary baǵa alǵan Meiirjan Jylqybaidyń shyǵarmashylyǵy balalarǵa arnalǵan basylymdar arqyly jaqsy nasihattaldy. Máselen, ózi respýblikalyq «Ulan» gazetiniń jas tilshisi bola júrip, jazǵan dúnieleri «Aq jelken», «Baldyrǵan» jýrnaldaryna da basylyp júrdi.
Jas jazýshynyń ereksheligi óznege dúnie shyǵarýǵa tyrysýynda. Máselen, kúlli adamzat qorqaq dep baǵalaityn qoiandy batyr etip sýrettegen týyndysy suranysqa tipti ie boldy.
Tarqatyp aitsaq, erteginiń basty keiipkeri – qoian ózine degen senimge kezdeisoq ie bolady. Sodan keiin túlki qoiannan qashyp ketedi. Al qoian óziniń batyrlyǵyna sene bastaidy. Sóitip qoian ormandaǵy eń batyr janýarǵa ainaldy. Jazýshy bul ertegi arqyly adam óz kúshine sense, maqsatyna jete alatyny týraly aitqysy keledi.
Aita keteiik, «Batyr qoian» sýretti kitaby Ońtústik Koreianyń Aziia mádeniet ortalyǵynyń qoldaýymen qazaq, orys, korei jáne aǵylshyn tilderinde basylyp shyqty. Kitaptyń sýretshisi – Nam Soń Hýn. Bul týraly Meiirjannyń ózi bylai deidi:
«Ertegi keiipkerlerin beineleý úshin sýretshi zoobaqqa baryp, qoian, tiin, túlkini óz kózimen kórdi. Óitkeni ár eldiń bir ózgesheligi bolady. Kitaptaǵy janýarlardyń túsi qatty qanyq emes. Koreiada balalar kitaphanasy men illiýstratorlar mýzeiine barǵanda baiqaǵanym – kitaptardyń jalpy sýrettegi boiaý qanyq emes. Óitkeni qanyq túster balalardy epilepsiia aýrýyna shaldyqtyrady eken. Sondyqtan Koreiada solǵyn tústerdi paidalanady. Jalpy, olar kitaptaǵy sýretke asa qatty mán beredi. Eger balyqshynyń sýretin baskiimsiz qylyp salsa, kitapty baspa qabyldamaidy. Sebebi sýretti kórgen bala baskiim kimei, basynan kún ótkizip alýy múmkin. Sonymen qatar «Dostyq» degen kitap nazarymdy aýdardy. Kitapty jazýshy jazǵan, biraq ishinde birde-bir sóz joq. Kitaptaǵy sýretterge qarap, áńgimeniń siýjetin túsinýge bolady. Belgili bir tildi bilý de qajet emes. Kez kelgen bala sýretterge qarap avtordyń oiyn túsinedi», - deidi Meiirjan.
Ras, qazirgi balalar qyzyldy-jasyldy, túrli-tústi kitaptarǵa qyzyǵady. Sondyqtan da balalarǵa arnalǵan sýretti kitaptar suranysqa ie. Sáikesinshe, balalarǵa arnalǵan kitaptardy basyp shyǵarý baǵasy da joǵary bolady. Osyny eskergen Meiirjan Jylqybai joǵaryda ataǵan «Taýǵa saiahat» atty kitabyn ekinshi ret bastyrǵan.
Jazýshy qazaq ádebietindegi barlyq ertegi keiipkerlerin jinaýdy armandaidy. Ol úshin alǵashy qadamdy jasap ta úlgerdi. Ol – «Ertegiler elinde» atty shyǵarmasy. Onda Periniń qyzy Bektory bizdiń álemge kelip, noýtbýktar urlap ketip, ertegidegi batyrlardy kompiýter oiynyna táýeldi etedi. Endi erlik jasaityn eshkim joq. Mine, jas jazýshy osylaisha ótken men búgingi zamandy toǵystyryp, balalardyń ádebi talǵamynan shyqqysy keledi.
Esterińizge sala keteiik, Meiirjan Jylqybaidyń negizgi mamandyǵy IT mamany. Ol «Taýǵa saiahat», «Batyr qoian» kitaptary arqyly tanylǵan. Halyqaralyq «Daraboz» ádebi baiqaýynda 2011 jyly «Qyryq birinshi ótiriktiń sońy» týyndysy úshin yntalandyrý syilyǵyn, 2015 jyly «Saiaq» áńgimesi úshin júldeli 2-oryndy aldy. 2017 jyly «Batyr qoian» ertegisi Ońtústik Koreiada 4 tilge aýdarylyp, jaryq kórdi.
