Almaty oblysyndaǵy Ótegen batyr aýylynda aǵash kesý jumystary kezinde kótergish tehnikanyń kenetten isten shyǵýy saldarynan eki jumysshy biikten qulap, aýyr jaraqat aldy. Turǵyndar eski tehnikanyń qaýipsizdik talaptaryna sai kelmeitinin aityp, jasyl jelektiń jappai kesilýine de alańdaýshylyq bildirdi, dep habarlaidy ult.kz.
KTK telearnasynyń habarlaýynsha, jergilikti turǵyndardyń aitýynsha, ondaǵan jyl boiy kútim kórmegen aǵashtardy kesý jumystary aldyn ala eskertýsiz bastalǵan. Oqiǵa kezinde kótergish qurylǵy buzylyp, jumysshylar tómenge qulaǵan. Kýágerlerdiń sózinshe, olardyń birin tehnika basyp qalǵan.
Oqiǵa saldarynan 2005 jáne 2002 jyly týǵan eki azamat aýrýhanaǵa jetkizildi. Dárigerler olardyń bas miynyń shaiqalýy, keýde qýysynyń jabyq jaraqaty, jambas súiekteriniń synýy sekildi kóptegen jaraqatpen túskenin málimdedi. Bir naýqas jansaqtaý bólimine, ekinshisi jaraqat bólimine jatqyzylǵan. Qazir olardyń jaǵdaiy birtindep jaqsaryp keledi.
Ótegen batyr aýyldyq okrýginiń ákimdigi merdiger kompaniiamen jasalǵan kelisimde barlyq talaptardyń saqtalǵanyn, al tehnika men eńbek qaýipsizdigine qatysty jaýapkershilik tolyǵymen merdigerge júkteletinin aitty.
Qazirgi ýaqytta oqiǵaǵa bailanysty politsiia tekseris júrgizip jatyr. Ákimdik qylmystyq is qozǵalmaǵan jaǵdaida merdiger kompaniiamen jumysty jalǵastyratynyn málimdedi.
