Ońtústik Qazaqstan oblysynyń ákimi Janseiit Túimebaev Qostanai oblysyndaǵy Rýdnyi indýstriialyq institýtynyń rektory, professor Ábdirahman Naizabekovty qabyldady.
Kezdesýde taraptar elimizdegi bilim berý júiesi men oǵan memleketten jasalyp jatqan qamqorlyq jaiyn sóz etip, osy máseler aiasynda júzege asyrylyp jatqan túrli baǵdarlamalar týraly áńgimelesti. Ásirese, oblys basshysy óńirimizdegi jastardy «Serpin-2050» baǵdarlamasy aiasynda Soltústiktegi ózi basqaratyn oqý ornyna shaqyra kelgen qonaqtyń usynysyn qup kórip, ony júzege asyrýdyń jai-japsaryn talqylady.
Tarihy HH ǵasyrdyń 50 jyldarynan bastaý alatyn Rýdnyi Indýstrialdyq institýty búginde tehnikalyq ǵylym salasynda infraqurylymy damyǵan zamanaýi ǵylymi-bilim kesheni bolyp tabylady. Institýt quramynda – 3 fakýltet (taý-metallýrgiialyq fakýltet, energetika jáne aqparattyq júieler fakýlteti, ekonomika jáne qurylys fakýlteti) pen 7 kafedra bar. Stýdentterdi oqytý jalpy orta, tehnikalyq jáne kásibi, joǵary bilim bazasynda kúndizgi, keshki jáne syrttai oqý nysany boiynsha memlekettik jáne orys tilderinde 18 bakalavr mamandyqtary boiynsha júrgiziledi.
Institýt oqytýshylary «Serpin-2050» baǵdarlamasy boiynsha sońǵy 2 jyldan beri shalǵai aýyldardan talapkerlerdi qabyldap, búginge deiin 250 stýdentti (onyń 200-ge jýyǵy OQO-dan) maman atandyryp otyr. Joǵary oqý orny rektorynyń aitýynsha, biyl taǵy 130 stýdent bizdiń óńirden Rýdnyiǵa attanyp, bilimin jalǵastyrady dep kútilýde. Oqý ornyn bitirgen túlekterdiń 95-98 paiyzy mamandyǵy boiynsha jumysqa ornalasatynyn jetkizgen professor onda jastar úshin barlyq jaǵdaidyń jasalǵanyn málimdedi.
Ákimmen ótken basqosýdan soń Á.Naizabekov Shymkenttegi Jastar ortalyǵynda birqatar talapkerlermen kezdesti. Rektor jastardy Soltústikte bilimin jalǵastyryp, sonda jumysqa ornalasýǵa shaqyrdy.
Aita keteiik, «Serpin-2050» baǵdarlamasy boiynsha, 2014 jyly 1000 grant bólinip, kúngeilik 326 jas oqýǵa tússe, 2015 jyly 34 kolledjge 1200 grant bólinip, 359 talapker bilimin jalǵastyrdy. Byltyr 31 kolledjge 1000 grant bólinip, óńirimizden 244 jas oqýǵa tústi. Jalpy sońǵy 3 jylda Ońtústikten «Serpin-2050» baǵdarlamasy boiynsha JOO-nda 4698 stýdent, kolledjderde 929 jas bilim alýda.
Al 2017 jyly «Serpin-2050» baǵdarlamasy aiasynda JOO-na 3793 memlekettik grant, al kolledjderge 720 grant bólinip otyr. 23-31 shilde aralyǵynda memlekettik grant iegeri atanýǵa óńirimizdiń jas túlekterinen «Serpin» jobasyna 7849 qujat tapsyrylǵan-dy.
