Bir aidan astam ýaqyt boiy juqpaly aýrýlar bólimshesiniń dárigerleri júktilik kezinde aýyr halde aýrýhanaǵa túsken Qostanai turǵyny Janna Ysqaqovanyń ómiri úshin kúresti, dep habarlaidy "Ult aqparat" oblystyq densaýlyq saqtaý basqarmasyna silteme jasap.
Janna Ysqaqova keshe ǵana aýrýhanadan shyǵyp, ailyq sábiin alǵash ret kórip, qolyna aldy.
Qyz bala juqpaly aýrýlar bóliminiń perzenthanasynda dúniege keldi. Jannanyń ózi 3 maýsymnan 20 shildege deiin infektsiialyq bólimde boldy. Júktiliktiń 33-aptasynda ókpesiniń 85%-y zaqymdanǵan.
«Osy ýaqyt ishinde men reanimatsiiada jatyp, ólim men ómirdiń arasynda boldym. Shyn máninde, óte qorqynyshty. Mundaidy eshkimniń basyna bermesin. Mynda kóptegen adamdar emdelip jatyr. Árkimniń basynan ótken óz oqiǵasy, qaiǵysy bar, – dep Janna ótken kezeńdi eske alady. – Men adamdardy ekpe salýǵa shaqyramyn. Basyma túspeidi dep oilamańyz, odan eshkim saqtandyrylmaǵan. Ekpe alyp, densaýlyqtaryńyzdy kútińizder».
Týǵan qyzyna keler bolsaq, ol qazir týystarynyń qaraýynda. Osy ýaqyt ishinde Janna jansaqtaý bóliminen palataǵa aýystyryldy, qyzyn tek beine bailanys arqyly kórip otyrdy.
«Sábi búkil bólimsheniń jiti nazarynda boldy, – deidi bólimshe meńgerýshisi Karina Iýsýpova. – Jylaǵanyn estimiz, qalai jýyndyrǵanyn, tamaqtandyrǵanyn, kiindirgenin kóremiz».
Juqpaly aýrýlar bóliminiń meńgerýshisiniń aitýynsha, Jannanyń ómiri úshin tek infektsionister men reanimatologtar ǵana emes, úsh balanyń anasyn qutqarýǵa ginekologtar, pýlmonologtar, ýrologtar, kardiologtar, terapevtter qatysty. Náreste neonatologtardyń muqiiat baqylaýynda boldy.
Jannany sábidiń shildehanasy, 1 jasqa tolǵan týǵan kúni, basqa da mańyzdy otbasylyq merekeler kútip tur. Alaida kóp qonaq shaqyryp, toi jasamaitynyn aitty. Sebebi otbasy densaýlyqty birinshi orynǵa qoiady.
