بٸر ايدان استام ۋاقىت بويى جۇقپالى اۋرۋلار بٶلٸمشەسٸنٸڭ دەرٸگەرلەرٸ جٷكتٸلٸك كەزٸندە اۋىر حالدە اۋرۋحاناعا تٷسكەن قوستاناي تۇرعىنى جاننا ىسقاقوۆانىڭ ٶمٸرٸ ٷشٸن كٷرەستٸ, دەپ حابارلايدى "ۇلت اقپارات" وبلىستىق دەنساۋلىق ساقتاۋ باسقارماسىنا سٸلتەمە جاساپ.
جاننا ىسقاقوۆا كەشە عانا اۋرۋحانادان شىعىپ, ايلىق سەبيٸن العاش رەت كٶرٸپ, قولىنا الدى.
قىز بالا جۇقپالى اۋرۋلار بٶلٸمٸنٸڭ پەرزەنتحاناسىندا دٷنيەگە كەلدٸ. جاننانىڭ ٶزٸ 3 ماۋسىمنان 20 شٸلدەگە دەيٸن ينفەكتسييالىق بٶلٸمدە بولدى. جٷكتٸلٸكتٸڭ 33-اپتاسىندا ٶكپەسٸنٸڭ 85%-ى زاقىمدانعان.
«وسى ۋاقىت ٸشٸندە مەن رەانيماتسييادا جاتىپ, ٶلٸم مەن ٶمٸردٸڭ اراسىندا بولدىم. شىن مەنٸندە, ٶتە قورقىنىشتى. مۇندايدى ەشكٸمنٸڭ باسىنا بەرمەسٸن. مىندا كٶپتەگەن ادامدار ەمدەلٸپ جاتىر. ەركٸمنٸڭ باسىنان ٶتكەن ٶز وقيعاسى, قايعىسى بار, – دەپ جاننا ٶتكەن كەزەڭدٸ ەسكە الادى. – مەن ادامداردى ەكپە سالۋعا شاقىرامىن. باسىما تٷسپەيدٸ دەپ ويلاماڭىز, ودان ەشكٸم ساقتاندىرىلماعان. ەكپە الىپ, دەنساۋلىقتارىڭىزدى كٷتٸڭٸزدەر».
تۋعان قىزىنا كەلەر بولساق, ول قازٸر تۋىستارىنىڭ قاراۋىندا. وسى ۋاقىت ٸشٸندە جاننا جانساقتاۋ بٶلٸمٸنەن پالاتاعا اۋىستىرىلدى, قىزىن تەك بەينە بايلانىس ارقىلى كٶرٸپ وتىردى.
«سەبي بٷكٸل بٶلٸمشەنٸڭ جٸتٸ نازارىندا بولدى, – دەيدٸ بٶلٸمشە مەڭگەرۋشٸسٸ كارينا يۋسۋپوۆا. – جىلاعانىن ەستيمٸز, قالاي جۋىندىرعانىن, تاماقتاندىرعانىن, كيٸندٸرگەنٸن كٶرەمٸز».
جۇقپالى اۋرۋلار بٶلٸمٸنٸڭ مەڭگەرۋشٸسٸنٸڭ ايتۋىنشا, جاننانىڭ ٶمٸرٸ ٷشٸن تەك ينفەكتسيونيستەر مەن رەانيماتولوگتار عانا ەمەس, ٷش بالانىڭ اناسىن قۇتقارۋعا گينەكولوگتار, پۋلمونولوگتار, ۋرولوگتار, كارديولوگتار, تەراپەۆتتەر قاتىستى. نەرەستە نەوناتولوگتاردىڭ مۇقييات باقىلاۋىندا بولدى.
جاننانى سەبيدٸڭ شٸلدەحاناسى, 1 جاسقا تولعان تۋعان كٷنٸ, باسقا دا ماڭىزدى وتباسىلىق مەرەكەلەر كٷتٸپ تۇر. الايدا كٶپ قوناق شاقىرىپ, توي جاسامايتىنىن ايتتى. سەبەبٸ وتباسى دەنساۋلىقتى بٸرٸنشٸ ورىنعا قويادى.
