Qazaqstannyń bylǵary qolǵap sheberi, bokstan álem chempiony Aslan Muqanov týǵan jezdesin óltirdi dep aiyptaldy.
"Kostanaiskie novosti" basylymynyń jazýynsha, 11 shildede kúdikke ilingen boksshy qylmys ornynan segiz shaqyrym qashyqtyqta ustaldy, dep jazady Sputnik agenttigi.
Aslan kishkentaiynan sportpen shuǵyldanǵan. Áýesqoi boksta tasy órge domalap, joǵary jetistikterge jetti, sport sheberi ataǵyn aldy. Ári qarai kásipqoi boksqa aýysqan. Qostanai komandasynyń kómegimen Muqanov Maiamige ketip, kásibi ringte alty jeńiske jetti. Sodan soń belgili promoýter Nelson Lopespen birge jumys istei bastady.
Muqanovtyń isi
13 shildede Qostanai aýdandyq sotynda tergeý toby Muqanovty qamaýǵa alýdy surady. Jantúrshigerlik qylmys jasady dep aiyptalǵan boksshy miz baqpai, jekpe-jek aldynda óz-ózin ishtei qairap otyrńan adamdai kóringen.
"Muqanov Pishenbaevty teris ómir salty men ápkesine kún kórsetpegeni úshin óltirýdi josparlaǵan. Ol aldyn ala daiyndaǵan pyshaqty alyp, Altyn Dala aýylyna jaiaý baryp, tańǵy saǵat altyda ápkesiniń esigin qaǵady. Esikti Pishenbaev ashady da, jatyn bólmege qaita kirip, jatyp qalypty. Muqanov jýynyp, ústine uzyn qońyr jeidesin kigen", - dep tergeýshi bolǵan oqiǵany baiandady.
Saǵat 6:40-ta Aslan jezdesi uiyqtap jatqan bólmege kirip, Pishenbaevtyń moinyna pyshaq salady. Er adam oianyp, qarsylyq kórsetýge tyrysqan. Sol kezde Muqanov Pishenbaevtyń keýdesi men qolyna taǵy birneshe ret pyshaq suǵypty. Pishenbaev shalqasynan jatyp, kóz jumǵan.
Eks-boksshyǵa QR QK 99-baby 2-bólimi 3-tarmaǵy boiynsha (Qarsylyq kórsetýge dármensiz adamdy qasaqana óltirý) aiyp taǵylǵan. Bul bap boiynsha sottalýshy 15 jylǵa deiin bas bostandyǵynan aiyrylýy múmkin.
Sotta Muqanov kinásin moiyndap, tergeýshimen tolyq kelisti. "Qaida bara jattyńyz? Nege sizdi Zarechnyi mańynda ustady?" degen suraqqa ol:
"Ózennen júzip óttim. Taýǵa shyqqym kelgen edi, aýa raiy jaqsy boldy... Sodan soń ata-anam qońyraý shaldy... Sońymnan kele jatqanyn sezip, politsiiany kúttim", - dep jaýap berdi.
Sot Aslandy eki aiǵa qamaýǵa alýǵa sheshim qabyldady.
Aslan Muqanovqa ne boldy?
Anasy Záýre Tólebaiqyzy áleýmettik jelilerdegi túrli qaýesetterden sharshap, bolǵan oqiǵanyń anyq-qanyǵyn aityp berýge kelisipti.
"Seka (Serik Pishenbaev) qyzymdy alaqanyna salyp, aialap ustady, otbasymyzǵa degen kóńili de erekshe edi. Kún kórsetpedi degen ne sóz? Jaqsy kóretin, qonaqqa barǵanymyzda bárimizge jaqsylyq tiledi. Aslan ekeýi aǵaiyndy siiaqty edi... Aslan Kolýmbiiada júrgende, aqsha jiberip kómektesti, bul jaily eshkimge tis jaryp aitpaǵan bolatyn", - deidi áiel kózine jas alyp.
Qaiǵydan qan jutyp otyrǵan ananyń aitýynsha, Aslanǵa bireýler yqpal etken.
"Sońǵy kezderi basqa álemde júrgendei edi. Ne oilaǵanyn bilsem, úige bailap qoiar edim", - deidi ol zar eńirep.
Áiel adamnyń sózine súiensek, shetelde Aslanǵa destrýktivti dini aǵym ókilderi yqpal etipti. Kolýmbiiada turmysy tómendep, ábden qinalǵan ol Qazaqstanǵa oralǵysy keledi.
Sóitip, biyl 26 maýsymda Aslan úiine oralady. Ata-anasyna óz isin bastaǵysy keletinin aityp, dostarymen sóilesip júripti. Alaida anasy ulynyń ózgergenin sol kezde sezgen eken.
"Kúlmeitinin birden baiqadym. Sóilesýge telefon alyp bergenbiz. Kúni boiy shuqylap, ózimen-ózi, bólek álemde otyratyn, - deidi Záýre Tólebaiqyzy. – Bir joly maǵan: "Mama, bilesiń be, adam ómiri osyndai qysqa" – dep moinyn saýsaǵymen keskendei etip kórsetti. Ol kezde neni meńzegenin eshqaisymyz túsinbeppiz".
Týǵan-týystary jigittiń bul kúiine qarap, basyna túsken aýyrtpalyqtan kúizeliske ushyraǵan ǵoi dep oilaǵan.
Esterińizge sala ketsek, 12 shildede Qostanai oblysynda bokstan Qazaqstan chempiony Aslan Muqanov adam óltirdi degen kúdikpen ustalǵany belgili boldy. Oblystaǵy politsiia departamentiniń aqparatyna sáikes, 11 shilde kúni 32 jastaǵy turǵynnyń denesi tabylǵan. Bul týraly politsiiaǵa qaitys bolǵan adamnyń áieli habarlapty.
