Qostanai oblysy politseileri málimetinshe, mal iesi 408-bap "Aýyl sharýashylyǵy janýarlaryn jaiý qaǵidalaryn, itter men mysyqtardy asyraý jáne serýendetý qaǵidalaryn, qańǵybas itter men mysyqtardy aýlaý jáne joiý qaǵidalaryn buzý" boiynsha ákimshilik jaýapkershilikke tartylǵan.
Áleýmettik jeli qoldanýshylaryna ary qarai ne bolǵany belgisiz bolyp qaldy. Pikir bildirýshiler siyrǵa janashyrlyq tanytyp, ony soimaýdy ótindi.
Qostanai eriktileri janýardy qutqarýdy uiǵarǵan.
"11 shildede keshke qashyp ketken siyr týraly postty kórdim. Sýrette siyrdyń móldiregen kózin kórdim. Áriptesime qońyraý shalyp, janýardy aman alyp qalýdy usyndym. Kýágerler onyń qai qasaphanada ekenin aitty. Siyrdyń iesin bilý úshin politsiiaǵa habarlastyq. Politsiia da eshteńe aitqan joq. Biz janýarlardy óltirmeýlerin surap post jazýdy jón kórdik", - deidi erikti Marina.
Kelesi kúni eriktiler janýardyń naqty ornalasqan jerin anyqtaǵan. Siyr qasaphanada bolyp shyqty. Onda eriktiler jýrnalistermen birge barǵanymen, olardy ishke kirgizbegen.
"Keiin áriptesim Elenaǵa siyr iesi qońyraý shalyp, onyń atyn aitpaýdy, deregin jariialamaýdy ótindi. Ol siyrdy iesine aparyp jatqanyn aitty. Siyrdyń ózinen ajyratyp alǵan buzaýy bar ekenin bildik. Siyrdyń nege qashyp ketkeni túsinikti boldy. Onyń ómir súrgisi kelgeni kórinip turdy. Ómirge degen mundai qushtarlyqty birinshi ret kórdik. Biz ony shynymen qutqarǵymyz keldi", - dedi Marina.
Áieldiń aitýynsha, endi janýardy óltirmeitinderi anyq. Siyr buzaýymen qaita qosyldy.
"Janýar iesi bir siyrdyń quny kólikti eseptemegende 480 myń teńge ekenin aitty. Biz aqsha jinamaimyz, onyń keregi joq. Siyrdy eriktilerimizdiń biri alady, qazir bul másele sheshilip jatyr", - dedi erikti.
Eske salaiyq, Qostanai ortalyǵynda júrgen siyr shabýylynan úsh adam zardap shekti. Er adam jambas súiegi syndy degen kúdikpen aýrýhanaǵa jatqyzylǵan, bir áieldiń aiaǵyn jaraqattaǵan, al zeinetker bilek súiegin syndyryp alǵan.
