Qostanai oblysynyń politseileri Qarabalyq aýdanynyń Prirechnoe aýylynda sibir eligi men jabaiy qabandy zańsyz aýlaǵandardy qolǵa túsirdi, dep habarlaidy "Ult aqparat".
Politsiianyń baspasóz qyzmeti taratqan aqparatqa súiensek, 23 jeltoqsan kúni izdeýde júrgen 44 jastaǵy azamatty ustalǵan. Tintý barysynda onyń úiinen 4 jabaiy qaban men 6 sibir eligi tárkilendi. Sondai-aq, eki elik jáne bir jabaiy qabannyń eti, tirkelmegen tegis uńǵyly myltyq pen 60 oq tabyldy.
«Qostanai oblysynyń tabiǵat qorǵaý politsiiasynyń bastyǵy politsiia podpolkovnigi Talǵat Ahmetovtyń aitýynsha, 2019 jyldyń 7 qyrkúieginen bastap 31 jeltoqsanǵa deiin jabaiy qaban men elikti aýlaý maýsymy ashyq. Janýarlardy atý úshin ań aýlaý litsenziiasy kerek. Atalǵan ańshynyń ruqsat qujattary joq bolyp shyqty. Qazirgi ýaqytta QR QK 337-babyna sáikes «Zańsyz ań aýlaý» faktisi boiynsha sotqa deiingi amaldar júrgizilip jatyr», - dedi oblystyq politsiia departamenti baspasóz qyzmetiniń mamany Kenje Qonysbai.
Jyl basynan beri Qostanai oblysynda 22 zańsyz ań aýlaý faktisi anyqtalǵan, tabiǵatty qorǵaý zańnamasyn buzǵany úshin 700-den astam adam ákimshilik jaýapkershilikke tartyldy.
