Qostanai oblysynda órtenip jatqan úi ishinen sábi qutqaryldy, dep habarlaidy "Ult aqparat" oblystyq TJD baspasóz qyzmetine silteme jasap.
Vedomstvo málimetinshe oqiǵa búgin saǵat 11:00 shamasynda Qostanai qalasyndaǵy Chkalov kóshesindegi úidiń birinde bolǵan. Órt sóndirýshiler kelgen kezde páter ishindegi jihazdar janyp jatqan.
«Órt 15 sharshy metr aýmaqty sharpydy. Saǵat 11:34-te tolyqtai sóndirildi. Órtenip jatqan úi ishinen bir sábi qutqaryldy. Barlyǵy 12 adam evakýatsiialandy. Oqiǵa ornyna 4 tehnika jumyldyryldy. Órt sóndirýshilerdi júieli is-áreketiniń arqasynda zardap shekkender bolmady» - delingen TJD-nyń aqparattyq habarlamasynda.
Órttiń naqty sebepteri men shyǵyndary anyqtalýda. TJD turǵyndarǵa qaýipsizdik sharalaryn barynsha saqtaýǵa shaqyrady.
