Qostanaida qarý-jaraq dúkeni órtenip, ǵimarattyń jertólesinen er adamnyń denesi shyǵaryldy, dep habarlaidy QazAqparat.
«Jertóleden er adamnyń denesi shyǵaryldy, onyń jeke basy ázirge anyqtalǵan joq. Sonymen qatar, qalalyq aýrýhanaǵa 1981 jyly týǵan er adam jetkizildi», - dep málimdedi oblystyq TJD-dan.
Buǵan deiin oblystyq densaýlyq saqtaý basqarmasynan málim etkendei, qarý-jaraq dúkenindegi órtten 7 adam zardap shekken.
«Jeti adam zardap shekti, olardyń altaýy túrli deńgeidegi kúiikpen statsionarǵa jetkizildi, bireýi aýrýhanaǵa jatýdan bas tartty», - dep habarlady basqarmadan.
Oqiǵa ornyna 6 jedel járdem brigadasy jóneltilgen. Órt bolǵan mańaidaǵy turǵyndarǵa da meditsinalyq kómek kórsetildi. Turǵyndar negizinen qan qysymynyń kóterilýi men bas aýrýyna shaǵymdanǵan.
Aita ketsek, búgin saǵat 11:20-da Qostanai qalasyndaǵy Nazarbaev dańǵylynda ornalasqan «Orýjeinaia palata» dúkeniniń ǵimaraty órtendi. Jalyn onyń janyndaǵy kólik jóndeý stansasynyń shatyry men ashana ǵimaratyn da sharpydy.
TJM baspasóz qyzmeti qarý-jaraqtyń jarylýyna bailanysty qutqarýshylardyń dúken ishine óte almai jatqandyǵyn jetkizgen edi. Al, dúken iesi ǵimarat jertólesinde 2 adam baryn aitqan bolatyn.
Belgili bolǵandai, dúkendegi órt saǵat 14:29-da sóndirildi, sebebi anyqtalyp jatyr.
