Foto: Májilis
Memleket basshysynyń tapsyrmasymen Májilis tóraǵasy Erlan Qoshanov Alash qairatkeri Mirjaqyp Dýlatulynyń 140 jyldyǵyna arnalǵan eskertkishtiń ashylý saltanatyna qatysty. Eskertkish Qostanai qalasynda boi kóterdi, dep habarlaidy Ult.kz.
Shara barysynda Májilis spikeri Prezident Qasym-Jomart Toqaevtyń quttyqtaý hatyn oqyp berdi. Memleket basshysy hatynda Mirjaqyp Dýlatulynyń ult rýhyn kóterýdegi eńbegin atap ótip:
«Ol qazaqtyń asqaq armany men muń-muqtajyn tereń túsinip, el múddesine qaltqysyz qyzmet etti. Halqymyzdyń birtýar perzentiniń qairatkerlik qasieti men azamattyq ustanymdary óskeleń urpaqqa árdaiym úlgi-ónege bolary sózsiz», – dedi.
Saltanatty jiynǵa Qostanai oblysynyń ákimi Qumar Aqsaqalov, Májilis depýtattary, ziialy qaýym ókilderi men jergilikti turǵyndar qatysty. Qazaqstannyń halyq jazýshysy Tólen Ábdik pen Mirjaqyp Dýlatulynyń jieni Erlan Satybaldiev sóz sóilep, Alash ardaqtysyna taǵzym etti.
Aita keteiik, qairatkerdiń 140 jyldyǵy respýblika kóleminde keńinen atalyp ótýde. Búgin Torǵai aýylynda halyqaralyq at marafony – «Uly dala joryǵy» alaman báigesi bastaldy. Tulparlar Tobyl–Torǵai dalasyn dúbirletip, 500 shaqyrymdyq qashyqtyqta synǵa túsedi. Sondai-aq, mirjaqyptanýǵa arnalǵan ǵylymi konferentsiia men respýblikalyq aitys uiymdastyrylady.
Erlan Qoshanov bul sharalar Alash arysyna degen halyqtyń qurmeti men memlekettiń baǵasyn aiqyndaitynyn atap ótti.
«Bizdiń búgingi maqsatymyz – Ádiletti, Qýatty, Taza jáne Qaýipsiz Qazaqstandy qurý. Bul – keshegi Alash arystarynyń da, búgingi bizdiń de ortaq armanymyz», – dedi Májilis tóraǵasy.
