Qostanaida turǵyn úi sektoryndaǵy órtten birneshe úielmen zardap shekti, dep habarlaidy QazAqparat.
Oblystyq tótenshe jaǵdailar departamentiniń málimetinshe, 9 mamyr keshki 17.23 shamasynda Qostanai qalasy Naberejnaia kóshesindegi turǵyn úi sektorynda órt tutanǵan.
Áýeli qala shetindegi Tobyl ózeniniń boiynda qamys janyp, bir sátte otqa oranǵan.
Qatty jeldiń saldarynan órt jaqyn mańdaǵy úilerge tarap, kóshe boiyndaǵy jeke sektordyń aýladaǵy qurylystaryn sharpydy.
Órt 1000 sharshy metr aýmaqty qamtyp, órttiń saldarynan 11-den astam turǵyn úi men 6 sharýashylyq qurylys jáne 4 avtokólik (onyń ishinde 2 júk kóligi), sonymen qatar 2 turǵyn úi ishinara zardap shekken. Janǵan qamystyń aýmaǵy 1,5 gektardan asty.
Órtti sóndirýge kúshti jel men qoiý tútin, sondai-aq bir-birine jaqyn ornalasqan turǵyn úiler men aýla qurylystary kedergi boldy. Qaza bolǵandar men zardap shekkender joq,
Naberejnaia kóshesi boiynsha 25 adam (onyń ishinde 5 bala) evakýatsiialandy.
Qostanai qalasynyń ákimdigi turǵyndardy qonystandyrý úshin «Dostyq» profilaktoriiinde ýaqytsha pýnkt daiyndady.
Órt 20:15-te aýyzdyqtalyp, 21:24-te tolyǵymen sóndirildi. Órtti sóndirýge TJD kúsh-quraldary jumyldyryldy (14 tehnika jáne jeke quramnan 85 adam).
Órttiń shyǵý sebebi jáne zalaly anyqtalyp jatyr.
