Qarabalyq aýdanynda 2015 jyly Qazaq handyǵynyń 550 jyldyǵyna arnalyp ornatylǵan eskertkish qulatyldy, dep habarlaidy «QazAqparat» tilshisi.
Qostanai oblysy Qarabalyq aýdanynda Qazaq handyǵynyń 550 jyldyǵyna arnalyp ornatylǵan eskertkish qiratyldy. Mundai keleńsiz kórinisti Erjigit Oralbekov esimdi Feisbýk jelisiniń qoldanýshysy óz paraqshasyna bólisken edi.
Áleýmettik jelide daý týdyrǵan jaǵdaiǵa bailanysty jergilikti atqarýshy bilik ókilderiniń jaýap berýin suradyq.
«Osy jyldyń kóktem aiynda eskertkish úgitile bastady. Óitkeni ol taza tsementten ǵana salynǵan. Jergilikti turǵyndarmen aqyldasa kele, qulaiyn dep turǵan arhitektýralyq formany aýystyrý nemese jóndeý máselesin talqyladyq. Sebebi, eskertkish kez kelgen ýaqytta qulaýy múmkin edi. Jaqynda munyń ornyna basqa eskertkish ornatýdy uiǵardyq. Jańa nysan taza qoladan jasalady jáne burynǵy eskertkishten 50-70 santimetrge biik bolady. Ol úshin Almaty qalasyna tapsyrys berildi. Qazan aiynyń alǵashqy onkúndiginde ákelinedi. Jańa eskertkishke Qarabalyq batyrdyń esimi beriledi , - dedi Qarabalyq aýylynyń ákimi Asan Shektibaev agenttik tilshisine bergen jaýabynda.
Aýyl ákiminiń sózinshe, jańa eskertkishtiń mańaiyn abattandyrýǵa bailanysty konkýrstyq sharalar ótkizilip jatyr. Jańa nysandy resmi bekitý úshin qajetti qujattar ministrlikke usynyldy. Aita keteiik, sáýlet kompozitsiiasy jeke kásipkerlerdiń qarajatyna salynady.
